ଗଞ୍ଜାମ ଜିଲ୍ଲାରେ ଆଇନଶୃଙ୍ଖଳା ରସାତଳଗାମୀ

ଗଞ୍ଜାମ ଜିଲ୍ଲାରେ ଆଇନଶୃଙ୍ଖଳା ରସାତଳଗାମୀ ହୋଇଛି । ଗୋଟିଏ ଜିଲ୍ଲାରେ ଦୁଇଟି ପୁଲିସ ଜିଲ୍ଲା ଓ ଦୁଇ ଦୁଇ ଜଣ ଏସ୍‌ପି ଥାଇ ବି ଆଇନଶୃଙ୍ଖଳା ପରିସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି । ଗଞ୍ଜାମ ଜିଲ୍ଲାରେ ଅପରାଧ କିଛି ନୂଆ କଥା ନୁହେଁ । ହତ୍ୟା, ଚୋରି, ଗଣଦୁଷ୍କର୍ମ, ବୋମାମାଡ଼ ଓ ଗୁଳିମାଡ଼ ନିତିଦିନିଆ ଘଟଣାରେ ପରିଣତ ହୋଇଛି । ଗୋଟିଏ ବର୍ଷ ଅର୍ଥାତ ୨୦୨୫ରେ ଜିଲ୍ଲାର ଆପରାଧିକ ତାଲିକା ବେଶ ଲମ୍ବା ରହିଛି । ଅନ୍ୟ ଜିଲ୍ଲାକୁ ପଛରେ ପକାଇ ଏକ ନମ୍ବରରେ ରହିଛି ଗଞ୍ଜାମ ।

ଏସବୁ ଭିତରେ ଗଞ୍ଜାମ ଜିଲ୍ଲା ଏବେ ପୁଣି ଚର୍ଚ୍ଚାରେ ରହିଛି । ୭ ଦିନ ପରେ ଜିଲ୍ଲାର ସୋରଡ଼ା ଥାନା ଅଞ୍ଚଳର ବାଲାପଙ୍କା ଗ୍ରାମ ନିକଟ ରଶିପଙ୍କାଳ ନିକଟରୁ ଅପହୃତ ବ୍ୟବସାୟୀଙ୍କ ଗଳିତ ମୃତଦେହ ପୋଲିସ ଉଦ୍ଧାର କରିଛି । ଏହି ଘଟଣାରେ ପ୍ରାୟ ୯ ଜଣଙ୍କୁ ପୋଲିସ ଉଠାଇ ଆଣିଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ଏଥିରେ ମୃତକଙ୍କ ସମ୍ପର୍କୀୟଙ୍କ ସହ ଜିଲ୍ଲାର ଅନ୍ୟ କିଛି ଲୋକ ସାମିଲ ଅଛନ୍ତି । ଜମିଜମା ବିବାଦରୁ ସୁଧୀରଙ୍କୁ ଅପହରଣ ଓ ହତ୍ୟା କରାଯାଇଥିବା କୁହାଯାଉଛି । ପ୍ରକାଶ ଯେ, ଗୋପାଳପୁର ଥାନା ଅଞ୍ଚଳର ପ୍ଲଟ ବ୍ୟବସାୟୀ ସୁଧୀର ପାତ୍ରଙ୍କୁ ଦୁବୃତ୍ତମାନେ ରାସ୍ତାରୁ ଟେକି ନେଇ ମୁଣ୍ଡ ଜାମିନ ରଖି ୨କୋଟି ମାଗିଲେ । ଏପ୍ରିଲ ୧୫ ତାରିଖରୁ ନିଖୋଜ ଥିବା ବେଳେ ସୁଧୀରଙ୍କ ପରିବାର ଏ ସମ୍ପର୍କରେ ପୋଲିସର ଦ୍ୱାରସ୍ଥ ହୋଇଥିଲେ ମଧ୍ୟ ପୋଲିସ ଉଦ୍ଧାର କରି ପାରିଲା ନାହିଁ । ଅନ୍ୟପକ୍ଷରେ ଥାନାରେ ଅଭିଯୋଗ ହେବାରୁ ଦୁବୃତ୍ତ ସୁଧୀରଙ୍କୁ ହତ୍ୟା କରି ଜଙ୍ଗଲରେ ଫିଙ୍ଗିଦେଲେ ।

ଏଭଳି ଅନେକ ଘଟଣାର ସାକ୍ଷୀ ହେଉଛି ଗଞ୍ଜାମ ଜିଲ୍ଲା । ଗତ ମାର୍ଚ୍ଚ ୨ ତାରିଖରେ ପୁରୁଷୋତ୍ତମ ଥାନା ଅନ୍ତର୍ଗତ ସୁଣ୍ଡିବାଙ୍କ ଗାଁ ନିକଟରେ ଗୁଳିମାଡ଼ ଘଟଣା ଚାଞ୍ଚଲ୍ୟ ସୃଷ୍ଟି କରିଥିଲା । ବହୁଚର୍ଚ୍ଚିତ ଗୋପାଳପୁର ଗଣଦୁଷ୍କର୍ମ ଦେଶରେ ଓଡ଼ିଶାକୁ ଲଜ୍ଜିତ କରିଥିଲା । ସେହିପରି ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ ଓ ଗଞ୍ଜାମରେ ୭ ବର୍ଷର ନାବାଳିକାକୁ ଦୁଷ୍କର୍ମ ପରେ ହତ୍ୟା କରାଯିବା ନେଇ ବୀଭତ୍ସ ଚିତ୍ର ବି ସାମ୍ନାକୁ ଆସିଥିଲା । ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ ସାରା ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଥିଲା । ଅପରାଧୀକୁ ପୋଲିସ ଧରୁଥିଲେ ମଧ୍ୟ ଅପରାଧ ସଂଖ୍ୟା କମିବାର ନାଁ ଧରୁନି ।

୨୦୨୫ ମସିହାରେ ବ୍ରହ୍ମପୁର ପୋଲିସ ଜିଲ୍ଲାରେ ଘଟିଥିବା ଘଟଣା ରାଜ୍ୟ ରାଜନୀତିରେ ହଟଚମଟ ସୃଷ୍ଟି କରିଥିଲା । ବର୍ଷର ପ୍ରାୟ ସବୁ ଦିନ କେଉଁଠି ନା କେଉଁଠି କିଛି ନା କିଛି ଆପରାଧିକ କାର୍ଯ୍ୟକଳାପ ଘଟିଛି, ଯାହାର ସଂଖ୍ୟା ୬ ହଜାର ୮୭୦ । ୨୦୨୫ ବର୍ଷରେ ୯୭ ହତ୍ୟା, ୧୯୪ ଦୁଷ୍କର୍ମ ଘଟିଛି । ଚୋରି ମାମଲା ତ ୧୩୦୦ ପାର୍‌ କରିଛି । ୬୫ଟି ସ୍ଥାନରେ ସଂଘର୍ଷ ଘଟିଛି । ସରକାରୀ ତଥ୍ୟ ଅନୁସାରେ ଗଞ୍ଜାମ ପୋଲିସ ଜିଲ୍ଲାରେ ଗୋଟିଏ ବର୍ଷରେ ୧୮ ହଜାର ୮୯ ଅପରାଧିକ ମାମଲା ରୁଜୁ ହୋଇଛି ।

ଏସବୁ ଅପରାଧିକ ମାମଲା ଯୋଗୁଁ ଜିଲ୍ଲାରେ ଅଶାନ୍ତି ବଢ଼ିବାରେ ଲାଗିଛି । ସବୁବେଳେ ଭୟର ବାତାବରଣ ରହୁଛି । ତେବେ କେବେ ଜିଲ୍ଲାର ଆଇନଶୃଙ୍ଖଳା ସ୍ଥିତି ସୁଧୁରିବ । ସରକାର ଏ ଦିଗରେ କଣ ପଦକ୍ଷେପ ନେଉଛନ୍ତି । ଏଭଳି ଅନେକ ପ୍ରଶ୍ନ ଉଠୁଛି । ସରକାର ଏ ଦିଗରେ ତୁରନ୍ତ ପଦକ୍ଷେପ ନେଇ ଜିଲ୍ଲାରେ ଶାନ୍ତି ଫେରାଇ ଆଣିବାର ଆବଶ୍ୟକତା ରହିଛି ।