Kirti Kiran Mahapatra
ପିନ୍ ବାର୍ତ୍ତା: ପବିତ୍ର ବିଶ୍ୱକର୍ମା ପୂଜା ଅବସରରେ ରାଜ୍ୟର ଅସଂଗଠିତ କ୍ଷେତ୍ରରେ ଦିନରାତି କାମ କରୁଥିବା ମେକାନିକମାନଙ୍କ ଆର୍ଥିକ ଓ ସାମାଜିକ ସୁରକ୍ଷା ପାଇଁ ଆଗେଇ ଆସିଛନ୍ତି ବ୍ରହ୍ମପୁର ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ । ମେକାନିକଙ୍କ ସର୍ବାଙ୍ଗୀନ ବିକାଶ ଓ ସେମାନଙ୍କ ଜୀବନଜୀବିକାକୁ ସୁରକ୍ଷିତ କରିବା ଲକ୍ଷ୍ୟରେ ସେ ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ଚିଠି ଲେଖି ୫ଟି ପ୍ରମୁଖ ଦାବି ଜଣାଇଛନ୍ତି । ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ବାବଦରେ ସାଂସଦ ନିଜ ସୋସିଆଲ ମିଡିଆ ରେ ପୋଷ୍ଟ କରି ସୂଚନା ଦେଇଛନ୍ତି ।
ମେକାନିକମାନଙ୍କ ଜୀବନଜୀବିକାର ସୁରକ୍ଷା ପାଇଁ ସାଂସଦଙ୍କ ଦ୍ୱାରା ଉପସ୍ଥାପିତ ହୋଇଥିବା ପ୍ରମୁଖ ଦାବିଗୁଡ଼ିକ ମଧ୍ୟରେ ରହିଥିବା ଅନୁରୋଧ ଗୁଡାକ ଯଥା, ୬୦ ବର୍ଷରୁ ଊର୍ଦ୍ଧ୍ୱ ବୟସ୍କ ମେକାନିକଙ୍କ ପାଇଁ ମାସିକ ପେନସନ୍ ବ୍ୟବସ୍ଥା, କର୍ତ୍ତବ୍ୟରତ ଅବସ୍ଥାରେ କୌଣସି ଦୁର୍ଘଟଣା ବା ମୃତ୍ୟୁ ଘଟିଲେ ପରିବାରକୁ ଉଚିତ କ୍ଷତିପୂରଣ ପ୍ରଦାନ, ଏବଂ ସେମାନଙ୍କର କୌଶଳ ଓ ଅବଦାନକୁ ସମ୍ମାନ ଜଣାଇ ଇଞ୍ଜିନିୟର ମାନ୍ୟତା ପ୍ରଦାନ । ଏହାଛଡ଼ା, ପ୍ରତିବର୍ଷ ବିଶ୍ୱକର୍ମା ପୂଜା ଅବସରରେ ମେକାନିକ ଦିବସ ପାଳନ ସହ ସରକାରୀ ଛୁଟି ଘୋଷଣା କରିବା ଏବଂ ସେମାନଙ୍କ ସମସ୍ୟାର ସ୍ଥାୟୀ ସମାଧାନ ପାଇଁ ଏକ ସ୍ୱତନ୍ତ୍ର ମେକାନିକ କଲ୍ୟାଣ ବୋର୍ଡ ଗଠନ କରିବାକୁ ଦାବି କରାଯାଇଛି ।
ଏହି ଦାବିଗୁଡ଼ିକ ବ୍ୟତୀତ, ଶ୍ରମ ଓ ଲୋକସେବା ବିଭାଗ ଅଧୀନରେ ଏକ ସ୍ୱତନ୍ତ୍ର ମେକାନିକ କଲ୍ୟାଣ ପାଣ୍ଠି (Mechanic Welfare Fund) ଗଠନ କରିବାକୁ ସାଂସଦ ପରାମର୍ଶ ଦେଇଛନ୍ତି । ଏହି ପାଣ୍ଠି ଜରିଆରେ ମେକାନିକମାନଙ୍କ ଚିକିତ୍ସା, ଜରୁରୀକାଳୀନ ସହାୟତା ଓ ପରିବାରର କଲ୍ୟାଣକାରୀ ଯୋଜନା କାର୍ଯ୍ୟକାରୀ ହୋଇପାରିବ । ରାଜ୍ୟର ଶ୍ରମିକ ଓ ମେକାନିକ ସମ୍ପ୍ରଦାୟ ଦୀର୍ଘ ଦିନରୁ ସୁରକ୍ଷିତ ଭବିଷ୍ୟତ ଓ ସରକାରୀ ସହାୟତା ପାଇଁ ଆଶା ରଖିଥିବା ବେଳେ, ଏହି ଦାବିଗୁଡ଼ିକ ଶୀଘ୍ର କାର୍ଯ୍ୟକାରୀ ହେଲେ ରାଜ୍ୟର ହଜାର ହଜାର ମେକାନିକ ପରିବାର ଉପକୃତ ହୋଇପାରିବେ ।
