Kirti Kiran Mahapatra
ପିନ୍ ବାର୍ତ୍ତା: ଓଡ଼ିଶାର କୋରାପୁଟ ଜିଲ୍ଲା ନନ୍ଦପୁର ବ୍ଲକ ଅନ୍ତର୍ଗତ ବାଲଡା ପାହାଡ଼ ଅଞ୍ଚଳରେ ପ୍ରସ୍ତାବିତ ବକ୍ସାଇଟ୍ ଖନନ ପାଇଁ ଡ୍ରୋନ୍ ସର୍ଭେକୁ ନେଇ ସ୍ଥାନୀୟ ଅଞ୍ଚଳରେ ପ୍ରବଳ ଅସନ୍ତୋଷ ଓ ଉତ୍ତେଜନା ଦେଖା ଦେଇଛି । ପଞ୍ଚମ ଅନୁସୂଚୀ ଅନ୍ତର୍ଭୁକ୍ତ ଏହି ସୁରକ୍ଷିତ ଆଦିବାସୀ ଅଞ୍ଚଳରେ କଳିଙ୍ଗ ଆଲୁମିନା ଲିମିଟେଡ୍ (ଆଦାନୀ ଗ୍ରୁପ୍) ପକ୍ଷରୁ ବିନା ଅନୁମତିରେ ଡ୍ରୋନ୍ ସର୍ଭେ କରାଯାଉଥିବା ଅଭିଯୋଗ କରି ଶହ ଶହ ଗ୍ରାମବାସୀ ଏହାକୁ କଡ଼ା ବିରୋଧ କରିଛନ୍ତି । ସ୍ଥାନୀୟ ଲୋକମାନେ ଏକାଠି ହୋଇ ସର୍ଭେ ଟିମ୍କୁ ଘେରାଉ କରିବା ସହ କମ୍ପାନୀ ପ୍ରତିନିଧି ଦିଲୀପ ପରିଚ୍ଛା, ପ୍ରମୋଦ ହିଆଲ ଓ ଅନ୍ୟ କର୍ମଚାରୀଙ୍କୁ ଅଟକ ରଖି ବନ୍ଧକ ବନାଇଥିଲେ । ଖବର ପାଇ ପାଡୁଆ ଥାନା ପୁଲିସ ଘଟଣାସ୍ଥଳରେ ପହଞ୍ଚି ବନ୍ଧକଙ୍କୁ ଉଦ୍ଧାର କରିବା ସହ ସର୍ଭେରେ ବ୍ୟବହୃତ ଡ୍ରୋନ୍ ଓ ଗାଡ଼ିଗୁଡ଼ିକୁ ଜବତ କରି ସର୍ଭେ କାର୍ଯ୍ୟ ବନ୍ଦ କରିଛି ।
ଏହି ଘଟଣାକୁ ନେଇ ତୈନ୍ତା, ଖଡ଼ାପୁଟ, ଚିଲମ୍, ବାଲଡା, ସୋପୁଟ, ସେମଲା, ବାନୁର, କାନ୍ତି, କଣ୍ଟାସାରୁ ଆଦି ଗ୍ରାମର ଗ୍ରାମସଭା ସଦସ୍ୟ ଏବଂ ଗ୍ରାମବାସୀମାନେ ୧୫ ସେପ୍ଟେମ୍ବର ୨୦୨୬ ରେ ପାଡୁଆ ଥାନା ଅଧିକାରୀଙ୍କୁ ଏକ ଲିଖିତ ଏତଲା ପ୍ରଦାନ କରିଛନ୍ତି । ଗ୍ରାମବାସୀଙ୍କ ଅଭିଯୋଗ ଅନୁସାରେ, ଗତ ସେପ୍ଟେମ୍ବର ୧୨ ରୁ ୧୫ ତାରିଖ ମଧ୍ୟରେ ସ୍ଥାନୀୟ ଜଙ୍ଗଲ, ବ୍ୟକ୍ତିଗତ ଚାଷ ଜମି ଓ ଗ୍ରାମୀଣ ଅଞ୍ଚଳ ଉପରେ କ୍ରମାଗତ ଭାବେ ଅନଧିକୃତ ଡ୍ରୋନ୍ ସର୍ଭେ କରାଯାଇଛି, ଯାହା ସ୍ଥାନୀୟ ଲୋକଙ୍କ ମନରେ ପ୍ରବଳ ଭୟ, ଆଶଙ୍କା ସୃଷ୍ଟି କରିଛି ।
ଲିଖିତ ଅଭିଯୋଗରେ ଦର୍ଶାଯାଇଛି ଯେ ଏହି ଡ୍ରୋନ୍ ସର୍ଭେର ଉଦ୍ଦେଶ୍ୟ, ପରିସର, କାର୍ଯ୍ୟକାରୀ ସଂସ୍ଥା କିମ୍ବା ସଂଗୃହିତ ତଥ୍ୟର ବ୍ୟବହାର ସମ୍ପର୍କରେ ଗ୍ରାମସଭା କିମ୍ବା ଗ୍ରାମବାସୀଙ୍କୁ କୌଣସି ପୂର୍ବ ସୂଚନା ଦିଆଯାଇନାହିଁ କିମ୍ବା ଅନୁମତି ନିଆଯାଇନାହିଁ । ପେସା (PESA) ଆଇନ ଏବଂ ପଞ୍ଚମ ଅନୁସୂଚୀ ଅଧୀନରେ ଆଦିବାସୀ ଓ ସ୍ଥାନୀୟ ସମ୍ପ୍ରଦାୟର ଜଳ, ଜଙ୍ଗଲ, ଜମି ଉପରେ ବୈଧାନିକ ଓ ପାରମ୍ପରିକ ଅଧିକାର ରହିଥିବା ସତ୍ତ୍ୱେ ଏହାକୁ ସମ୍ପୂର୍ଣ୍ଣ ଅଣଦେଖା କରାଯାଇଛି । ଏହା ବ୍ୟତୀତ, ଏହି ଜମି, ଜଙ୍ଗଲ ଓ ସାମ୍ପ୍ରଦାୟିକ ଅଧିକାର ସମ୍ପର୍କିତ କେତେକ ଗୁରୁତ୍ୱପୂର୍ଣ୍ଣ ମାମଲା ଓଡ଼ିଶା ଉଚ୍ଚ ନ୍ୟାୟାଳୟ (Hon’ble High Court of Odisha) ଏବଂ କଲିକତା ସ୍ଥିତ ଜାତୀୟ ସବୁଜ ପ୍ରାଧିକରଣ (NGT Eastern Zone Bench, Kolkata) ରେ ବିଚାରାଧୀନ ରହିଛି । ଏଭଳି ପରିସ୍ଥିତିରେ ଆଇନଗତ ନିୟମକୁ ଉଲ୍ଲଂଘନ କରି କରାଯାଉଥିବା ସର୍ଭେ ଅଦାଲତଙ୍କ କାର୍ଯ୍ୟଧାରାରେ ହସ୍ତକ୍ଷେପ କରିବାର ଆଶଙ୍କା ରହିଛି ।
ଗ୍ରାମବାସୀମାନେ ପୁଲିସ ପ୍ରଶାସନ ନିକଟରେ ଦାବି କରିଛନ୍ତି ଯେ ଏହି ଅନଧିକୃତ ସର୍ଭେ ବିରୋଧରେ ତୁରନ୍ତ ଏଫ୍ଆଇଆର୍ (FIR) ରୁଜୁ କରାଯାଉ ଏବଂ ସମସ୍ତ ବେଆଇନ ଡ୍ରୋନ୍ କାର୍ଯ୍ୟକଳାପକୁ ସମ୍ପୂର୍ଣ୍ଣ ବନ୍ଦ କରାଯାଉ । ଏହା ସହିତ କମ୍ପାନୀ ପ୍ରତିନିଧି ଶ୍ରୀ ଦିଲୀପ ଓ ଡ୍ରୋନ୍ ଚାଳକଙ୍କ ନିକଟରେ ବୈଧ ଅନୁମତିପତ୍ର ଅଛି କି ନାହିଁ ତାହାର ତଦନ୍ତ କରିବାକୁ ଏବଂ ସଂଗୃହିତ ଡାଟା/ଭିଡିଓର ବ୍ୟବହାର ଉପରେ କଟକଣା ଲଗାଇବାକୁ ଗ୍ରାମସଭା ନିବେଦନ କରିଛି ।
ଉଲ୍ଲେଖଯୋଗ୍ୟ ଯେ, ୨୦୦୮ ମସିହାରେ ବାଲଡା ପାହାଡ଼ ଓ ଗୁମ୍ଫା ଅଞ୍ଚଳକୁ ପରିବେଶ ପର୍ଯ୍ୟଟନ ସ୍ଥଳୀର ମାନ୍ୟତା ମିଳିଥିବା ବେଳେ ପରବର୍ତ୍ତୀ ସମୟରେ ଏହାକୁ ଖନନ ପାଇଁ ନିଲାମ କରାଯାଇଥିଲା । ଏହାପୂର୍ବରୁ ମଧ୍ୟ କମ୍ପାନୀର ମୋବାଇଲ ସ୍ୱାସ୍ଥ୍ୟ ସେବା ଗାଡ଼ିକୁ ଗ୍ରାମବାସୀ ବିରୋଧ କରିଥିଲେ । ବର୍ତ୍ତମାନ ଗ୍ରାମସଭାର ସମ୍ମତି ଓ ସକ୍ରିୟ ଭାଗିଦାରୀ ବିନା ଜମି ଓ ଜଙ୍ଗଲ ଉପରେ କୌଣସି କାର୍ଯ୍ୟକଳାପକୁ ଗ୍ରହଣ କରାଯିବ ନାହିଁ ବୋଲି ସ୍ଥାନୀୟ ଅଞ୍ଚଳବାସୀ ଦୃଢ଼ୋକ୍ତି ପ୍ରକାଶ କରିଛନ୍ତି ।
