ଜାପାନୀ କମ୍ପାନୀଙ୍କ ସହ ଓଡ଼ିଶାର ବଡ଼ ଚୁକ୍ତି: ୬୭ ହଜାର କୋଟିର ପୁଞ୍ଜିନିବେଶ, ୭,୬୦୦ ନିଯୁକ୍ତି ସମ୍ଭାବନା

ଭୁବନେଶ୍ୱର, ୩ ଜୁଲାଇ: ସବୁଜ ଶକ୍ତି କ୍ଷେତ୍ରରେ ଓଡ଼ିଶାକୁ ଏକ ବିଶ୍ୱସ୍ତରୀୟ କେନ୍ଦ୍ରରେ ପରିଣତ କରିବା ଲକ୍ଷ୍ୟରେ ରାଜ୍ୟ ସରକାର ଜାପାନର ପ୍ରମୁଖ ଶିଳ୍ପ ସଂସ୍ଥା ACME Group ଏବଂ IHI Corporation ସହ ସହଯୋଗ ପତ୍ର (MoC) ସ୍ୱାକ୍ଷର କରିଛନ୍ତି। ଏହି ସହଯୋଗ ଅଧୀନରେ ପାରାଦୀପ ଓ ଗୋପାଳପୁରରେ ତିନୋଟି ବୃହତ୍ ଗ୍ରୀନ୍ ଏନର୍ଜି ପ୍ରକଳ୍ପ ସ୍ଥାପନ କରାଯିବ।

ଲୋକସେବା ଭବନରେ ଜାପାନୀ ବ୍ୟବସାୟିକ ପ୍ରତିନିଧିମଣ୍ଡଳ ସହ ଆୟୋଜିତ ବୈଠକରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ, ଓଡ଼ିଶାର ଶିଳ୍ପ ବିକାଶର ନୂଆ ଦିଗ ପ୍ରଯୁକ୍ତି, ନବସୃଜନ ଏବଂ ଗ୍ରୀନ୍ ଇକୋନୋମି ଉପରେ ଆଧାରିତ ହେବ। ଆଧୁନିକ ପ୍ରଯୁକ୍ତି ଓ ପରିବେଶ ଅନୁକୂଳ ଶିଳ୍ପାୟନ ମାଧ୍ୟମରେ ଓଡ଼ିଶାକୁ ଏକ “ଗ୍ଲୋବାଲ୍ ଗ୍ରୀନ୍ ହବ୍” ଭାବେ ବିକଶିତ କରିବା ସରକାରଙ୍କ ଲକ୍ଷ୍ୟ ବୋଲି ସେ କହିଛନ୍ତି।

୬୭ ହଜାର କୋଟିର ନିବେଶ

ଏହି ଚୁକ୍ତି ଅନୁଯାୟୀ ପ୍ରାୟ ୬୭,୦୦୦ କୋଟି ଟଙ୍କାର ପୁଞ୍ଜିନିବେଶ ହେବାକୁ ଥିବାବେଳେ ପ୍ରାୟ ୭,୬୦୦ ଜଣଙ୍କ ପାଇଁ ରୋଜଗାର ସୁଯୋଗ ସୃଷ୍ଟି ହେବ ବୋଲି ଆକଳନ କରାଯାଇଛି। ଏହା ସହିତ ଉନ୍ନତ ପ୍ରଯୁକ୍ତି, ପରିବେଶ ଅନୁକୂଳ ଉତ୍ପାଦନ ପ୍ରଣାଳୀ ଓ ଦୀର୍ଘସ୍ଥାୟୀ ଶିଳ୍ପ ବିକାଶକୁ ମଧ୍ୟ ଗୁରୁତ୍ୱ ଦିଆଯିବ।

କେଉଁଠି ହେବ ପ୍ରକଳ୍ପ?

ଗୋପାଳପୁରରେ ୨୦,୦୦୦ କୋଟି ଟଙ୍କା ବ୍ୟୟରେ ବାର୍ଷିକ ୦.୪ ମିଲିୟନ୍ ଟନ୍ କ୍ଷମତା ବିଶିଷ୍ଟ ଗ୍ରୀନ୍ ଆମୋନିଆ ପ୍ଲାଣ୍ଟ ସ୍ଥାପନ କରାଯିବ। ଏହା ସହ ଅତିରିକ୍ତ ୧,୦୦୦ କୋଟି ଟଙ୍କା ବ୍ୟୟରେ ଏକ ଜେଟିବିହୀନ ଫ୍ଲୋଟିଂ ଟର୍ମିନାଲ୍ ଭିତ୍ତିଭୂମି ମଧ୍ୟ ନିର୍ମାଣ କରାଯିବ। ଏହି ପ୍ରକଳ୍ପରେ ପ୍ରାୟ ୩,୪୦୦ ଜଣଙ୍କୁ ନିଯୁକ୍ତି ମିଳିବ।

ପାରାଦୀପରେ ୩୪,୦୦୦ କୋଟି ଟଙ୍କା ନିବେଶରେ ୦.୮ ମିଲିୟନ୍ ଟନ୍ କ୍ଷମତାର ଗ୍ରୀନ୍ ଆମୋନିଆ ପ୍ଲାଣ୍ଟ ସ୍ଥାପନ କରାଯିବ। ଏହା ମାଧ୍ୟମରେ ପ୍ରାୟ ୩,୬୦୦ ଜଣଙ୍କୁ କର୍ମସଂସ୍ଥାନ ମିଳିବ।

ଏହାଛଡ଼ା ପାରାଦୀପରେ ୧୨,୦୦୦ କୋଟି ଟଙ୍କା ବ୍ୟୟରେ ବାର୍ଷିକ ୦.୧ ମିଲିୟନ୍ ଟନ୍ କ୍ଷମତା ବିଶିଷ୍ଟ ଗ୍ରୀନ୍ ମିଥାନଲ୍ ପ୍ରକଳ୍ପ ସ୍ଥାପନ ହେବ। ଏହା ଦ୍ୱାରା ପ୍ରାୟ ୬୦୦ ଜଣଙ୍କ ପାଇଁ ନୂଆ ଚାକିରି ସୃଷ୍ଟି ହେବ।

ଗ୍ରୀନ୍ ହାଇଡ୍ରୋଜେନ୍ କ୍ଷେତ୍ରରେ ଓଡ଼ିଶାର ଅଗ୍ରଗତି

ମୁଖ୍ୟମନ୍ତ୍ରୀ କହିଛନ୍ତି ଯେ, ରାଜ୍ୟରେ ଏପର୍ଯ୍ୟନ୍ତ ୧୨ଟି ଗ୍ରୀନ୍ ହାଇଡ୍ରୋଜେନ୍ ଓ ଗ୍ରୀନ୍ ଆମୋନିଆ ପ୍ରକଳ୍ପକୁ ଅନୁମୋଦନ ମିଳିଛି। ଏହି ସବୁ ପ୍ରକଳ୍ପ ମାଧ୍ୟମରେ ୨ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜିନିବେଶ ଆସିବା ସହ ୩୬ ହଜାରରୁ ଅଧିକ ନିଯୁକ୍ତି ସୃଷ୍ଟି ହେବାର ଆଶା କରାଯାଉଛି।

ପାରାଦୀପ, କେନ୍ଦ୍ରାପଡ଼ା ଓ ଗୋପାଳପୁରକୁ କେନ୍ଦ୍ର କରି ଦୁଇଟି ଗ୍ରୀନ୍ ଇଣ୍ଡଷ୍ଟ୍ରିଆଲ୍ କରିଡର ବିକାଶ କରାଯାଉଛି। ଏହା ମାଧ୍ୟମରେ ଓଡ଼ିଶାକୁ ଗ୍ରୀନ୍ ଷ୍ଟିଲ୍ ଉତ୍ପାଦନରେ ଅଗ୍ରଣୀ ରାଜ୍ୟ ଭାବେ ପ୍ରତିଷ୍ଠିତ କରିବା ଲକ୍ଷ୍ୟ ରହିଛି।

ଜାପାନୀ କମ୍ପାନୀଙ୍କ ଆଗ୍ରହ

ବୈଠକରେ ଉପସ୍ଥିତ IHI Corporationର ପ୍ରତିନିଧିମାନେ ଓଡ଼ିଶାର ଶିଳ୍ପ ନୀତି ଓ ପୁଞ୍ଜିନିବେଶ ପରିବେଶକୁ ପ୍ରଶଂସା କରିଥିଲେ। ସେମାନଙ୍କ ମତରେ, ସବୁଜ ଶକ୍ତି କ୍ଷେତ୍ରରେ ଜାପାନୀ ନିବେଶ ପାଇଁ ଓଡ଼ିଶା ଏକ ଉପଯୁକ୍ତ ଗନ୍ତବ୍ୟସ୍ଥଳ।

Mitsubishi Gas Chemicalର ପ୍ରତିନିଧିମାନେ ମଧ୍ୟ ରାଜ୍ୟ ସହ ଗ୍ରୀନ୍ କେମିକାଲ୍ ଓ ସସ୍ଥାୟୀ ଇନ୍ଧନ କ୍ଷେତ୍ରରେ କାମ କରିବାକୁ ଆଗ୍ରହ ପ୍ରକାଶ କରିଥିଲେ।

ଅନ୍ୟପକ୍ଷରେ ACME Groupର ଅଧ୍ୟକ୍ଷ ମନୋଜ କୁମାର ଉପାଧ୍ୟାୟ କହିଥିଲେ ଯେ, ଶିଳ୍ପାନୁକୂଳ ପରିବେଶ, ଭୌଗୋଳିକ ସୁବିଧା ଓ ରପ୍ତାନି କ୍ଷମତା ଦୃଷ୍ଟିରୁ ଓଡ଼ିଶା ଗ୍ରୀନ୍ ଏନର୍ଜି ନିବେଶ ପାଇଁ ଦେଶର ସବୁଠାରୁ ଆକର୍ଷଣୀୟ ରାଜ୍ୟ ଭାବେ ଉଭା ହୋଇଛି। ଭବିଷ୍ୟତରେ ଓଡ଼ିଶାରୁ ଜାପାନକୁ ଗ୍ରୀନ୍ ଇନ୍ଧନ ରପ୍ତାନିର ବଡ଼ ସୁଯୋଗ ରହିଛି ବୋଲି ସେ ମତ ଦେଇଥିଲେ।

ରାଜ୍ୟ ସରକାରଙ୍କ ମତାନୁସାରେ, ଏହି ଚୁକ୍ତି ଓଡ଼ିଶାକୁ ସ୍ୱଚ୍ଛ ଶକ୍ତି, ନବସୃଜନ ଏବଂ ଆନ୍ତର୍ଜାତିକ ଶିଳ୍ପ ସହଯୋଗ କ୍ଷେତ୍ରରେ ଏକ ନୂଆ ଉଚ୍ଚତାକୁ ନେଇଯିବ।