ପୌଷ୍ଟିକତା ମୋହନ ସରକାରଙ୍କ ପ୍ରାଥମିକତା

ମୋହନ ମାଝୀ ସରକାରଙ୍କ ଅନେକ ପ୍ରଶଂସନୀୟ ନିଷ୍ପତ୍ତିଗୁଡିକ ମଧ୍ୟରୁ ସ୍କୁଲଗୁଡ଼ିକରେ ମଧ୍ୟାହ୍ନ ଭୋଜନରେ ଅଣ୍ଡା ପ୍ରଦାନ ବ୍ୟବସ୍ଥାକୁ ଜାରି ରଖିବା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ତତ୍କାଳୀନ ବିଜେଡି ସରକାର ସମୟରେ ସ୍କୁଲ ମଧ୍ୟାହ୍ନ ଭୋଜନରେ ପିଲାମାନଙ୍କୁ ପୁଷ୍ଟିସାରଯୁକ୍ତ ଖାଦ୍ୟ ଯୋଗାଇଦେବା ଲକ୍ଷ୍ୟରେ ଅଣ୍ଡା ପ୍ରଦାନ କରାଯାଉଥିବା ବେଳେ ବିଜେପି ଓଡ଼ିଶାର ଶାସନଭାର ସମ୍ଭାଳିବା ପରେ ମୋହନ ସରକାର ମଧ୍ୟ ଏହି ବ୍ୟବସ୍ଥାକୁ ଅବ୍ୟାହତ ରଖିଛନ୍ତି । ମୋହନ ସରକାର ରାଜନୀତିଠାରୁ ଊର୍ଦ୍ଧ୍ୱରେ ରହି ଶିଶୁମାନଙ୍କ ପୌଷ୍ଟିକତାକୁ ପ୍ରାଥମିକତା ଦେଇଛନ୍ତି । ଅଣ୍ଡାରେ ମଧ୍ୟ ଭରପୂର ପ୍ରୋଟିନ ରହିଛି, ଯାହା ପିଲାମାନଙ୍କ ବୌଦ୍ଧିକ ଓ ଶାରୀରିକ ବିକାଶରେ ମଧ୍ୟ ବିଶେଷ ସହାୟକ ହେଉଛି ।

ବିଜେପି ସରକାର ବିଶେଷକରି ଧାର୍ମିକ ଭାବନା, ସାକାହାରୀ ହେବାକୁ ଅଧିକ ଗୁରୁତ୍ୱ ଦେଉଥିବାରୁ ଅନେକ ବିଜେପି ଶାସିତ ରାଜ୍ୟରେ ମଧ୍ୟାହ୍ନ ଭୋଜନରେ ଅଣ୍ଡା ପ୍ରଦାନ କରାଯାଉନାହିଁ । ଦେଶରେ ୧୪ଟି ଏହିଭଳି ରାଜ୍ୟ ରହିଛି ଯେଉଁଠି ପିଲାମାନଙ୍କୁ ପ୍ରୋଟିନଯୁକ୍ତ ଖାଦ୍ୟ ଭାବେ ଅଣ୍ଡା ଦିଆଯାଉନାହିଁ ।ସେଥିମଧ୍ୟରୁ ୧୧ଟି ରାଜ୍ୟ ବିଜେପି ଶାସିତ । ପିଲାଙ୍କ ମଧ୍ୟାହ୍ନ ଭୋଜନରେ ଅଣ୍ଡା ବାଦ ରଖିଥିବା ବିଜେପି ଶାସିତ ରାଜ୍ୟଗୁଡିକ ହେଲା- ଉତ୍ତର ପ୍ରଦେଶ, ମଧ୍ୟ ପ୍ରଦେଶ, ଗୁଜରାଟ, ରାଜସ୍ଥାନ, ହରିୟାଣା, ଛତିଶଗଡ଼, ପଶ୍ଚିମବଙ୍ଗ, ଗୋଆ, ତ୍ରିପୁରା, ଅରୁଣାଚଳ ପ୍ରଦେଶ ଓ ମଣିପୁର । ହେଲେ ଆସାମ, ଓଡିଶା, ଉତ୍ତରାଖଣ୍ଡ, ବିହାର ଓ ମହାରାଷ୍ଟ୍ର ଭଳି ବିଜେପି ଶାସିତ ରାଜ୍ୟରେ ମଧ୍ୟାହ୍ନ ଭୋଜନରେ ଅଣ୍ଡା ପ୍ରଦାନ କରାଯାଉଛି । ଓଡ଼ିଶା ଅପପୁଷ୍ଟି ରୋକିବାରେ ମଧ୍ୟ ନୂଆ ରେକର୍ଡ ସୃଷ୍ଟି କରିଛି ।

ଲକ୍ଷାଧିକ ଛାତ୍ରଛାତ୍ରୀଙ୍କ ପାଇଁ ଅଣ୍ଡା ହେଉଛି ସୁଲଭ ଏବଂ ଭରସାଯୋଗ୍ୟ ପ୍ରୋଟିନର ଉତ୍ସ, ଯାହା ସେମାନଙ୍କ ଉନ୍ନତ ସ୍ୱାସ୍ଥ୍ୟ ଓ ଶୈକ୍ଷିକ ପ୍ରଣାଳୀରେ ସକାରାତ୍ମକ ପ୍ରଭାବ ପକାଇଥାଏ । ମୋହନ ସରକାର ଏହି ଆବଶ୍ୟକତାକୁ ଗୁରୁତ୍ୱ ଦେଇ ସ୍କୁଲ ମଧ୍ୟାହ୍ନ ଭୋଜନରେ ପିଲାମାନଙ୍କୁ ଅଣ୍ଡା ପ୍ରଦାନ ବ୍ୟବସ୍ଥାକୁ ଅବ୍ୟାହତ ରଖିଛନ୍ତି । ସୁଶାସନର ଅର୍ଥ କେବଳ ନୂଆ ଯୋଜନା ଘୋଷଣା କରିବା ନୁହେଁ; ବରଂ ସାଧାରଣ ଲୋକଙ୍କ କଲ୍ୟାଣରେ ଫଳପ୍ରଦ ସାବ୍ୟସ୍ତ ହୋଇଥିବା ଯୋଜନାଗୁଡ଼ିକୁ ଜାରି ରଖିବା । ମୋହନ ସରକାରଙ୍କ ଏହି ନିଷ୍ପତ୍ତି ଏକ ସ୍ୱାଗତଯୋଗ୍ୟ ପଦକ୍ଷେପ ।