PiN Barta
ଭବାନୀପାଟଣା, କାର୍ଗିଲ ବିଜୟ ଦିବସ ଅବସରରେ ଦେଶ ପାଇଁ ସର୍ବୋଚ୍ଚ ବଳିଦାନ ଦେଇଥିବା ୬୭୪ ଜଣ କାର୍ଗିଲ ସହିଦଙ୍କ ପରିବାର ପ୍ରତି କୃତଜ୍ଞତା, ସମ୍ମାନ ଓ ସମବେଦନା ଜଣାଇବା ପାଇଁ ରାଜ୍ୟସଭା ସାଂସଦ ଶ୍ରୀ ସୁଜିତ କୁମାର ଏକ ଅଭିନବ ପଦକ୍ଷେପ ଗ୍ରହଣ କରିଛନ୍ତି। ତାଙ୍କ ପ୍ରୟାସରେ କଳାହାଣ୍ଡି ଜିଲ୍ଲାର ବିଭିନ୍ନ ସରକାରୀ ବିଦ୍ୟାଳୟର ଛାତ୍ରଛାତ୍ରୀମାନେ କାର୍ଗିଲ ସହିଦଙ୍କ ପରିବାରଙ୍କ ଉଦ୍ଦେଶ୍ୟରେ ୬୭୪ଟି ହସ୍ତଲିଖିତ ଚିଠି ଲେଖିଛନ୍ତି।
ଆସନ୍ତା ୨୬ ଜୁଲାଇରେ ସମଗ୍ର ଦେଶ କାର୍ଗିଲ ବିଜୟ ଦିବସ ପାଳନ କରିବାକୁ ଯାଉଥିବାବେଳେ, ଏହି ଅଭିଯାନ ମାଧ୍ୟମରେ ଛାତ୍ରଛାତ୍ରୀମାନେ ସହିଦଙ୍କ ବଳିଦାନକୁ ସ୍ମରଣ କରିବା ସହିତ ସେମାନଙ୍କ ପରିବାର ପ୍ରତି କୃତଜ୍ଞତା ଓ ସମ୍ମାନ ପ୍ରକାଶ କରିଛନ୍ତି। ଚିଠିଗୁଡ଼ିକ ଓଡ଼ିଆ, ହିନ୍ଦୀ ଓ ଇଂରାଜୀ ଭାଷାରେ ଲେଖାଯାଇଛି। ଏଭଳି ଏକ ଜାତୀୟ ଦାୟିତ୍ୱରେ ସାମିଲ ହୋଇପାରି ଛାତ୍ରଛାତ୍ରୀମାନେ ମଧ୍ୟ ଗର୍ବ ଓ ଆନନ୍ଦ ପ୍ରକାଶ କରିଛନ୍ତି।
ଏହି ଅବସରରେ ରାଜ୍ୟସଭା ସାଂସଦ ଶ୍ରୀ ସୁଜିତ କୁମାର କହିଛନ୍ତି, “କାର୍ଗିଲ ଯୁଦ୍ଧରେ ଦେଶ ପାଇଁ ସର୍ବୋଚ୍ଚ ବଳିଦାନ ଦେଇଥିବା ବୀର ସହିଦମାନଙ୍କ ସ୍ମୃତିକୁ ଆମେ ପ୍ରତିବର୍ଷ କାର୍ଗିଲ ବିଜୟ ଦିବସରେ ଶ୍ରଦ୍ଧାର ସହ ସ୍ମରଣ କରୁ। କିନ୍ତୁ ଯେଉଁ ପରିବାର ଦେଶ ପାଇଁ ନିଜ ପୁଅ, ସ୍ୱାମୀ କିମ୍ବା ଭାଇଙ୍କୁ ହରାଇଛନ୍ତି, ସେମାନଙ୍କ ପ୍ରତି କୃତଜ୍ଞତା ଓ ସମ୍ମାନ ପ୍ରକାଶ କରିବା ମଧ୍ୟ ଆମ ସମସ୍ତଙ୍କର ନୈତିକ ଦାୟିତ୍ୱ। ଛାତ୍ରଛାତ୍ରୀଙ୍କ ଏହି ଚିଠିଗୁଡ଼ିକ କେବଳ ଶବ୍ଦ ନୁହେଁ, ବରଂ ନୂତନ ପିଢ଼ିର ଶ୍ରଦ୍ଧା, କୃତଜ୍ଞତା ଓ ଜାତୀୟତାର ଭାବନାର ପ୍ରତିଫଳନ।”
ସାଂସଦଙ୍କ କାର୍ଯ୍ୟାଳୟ ପକ୍ଷରୁ ଏହି ଅଭିଯାନ ପାଇଁ ପୂର୍ବରୁ ବ୍ୟାପକ ପ୍ରସ୍ତୁତି କରାଯାଇଥିଲା। ଏଥିରେ ସାଂସଦଙ୍କ ପୋଷ୍ୟ ବିଦ୍ୟାଳୟ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟ, ଭଟାଙ୍ଗପଦର; ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟ, ସଗଡ଼ା ସମେତ କଳାହାଣ୍ଡି ଜିଲ୍ଲାର ; ପିଏମ୍ ଶ୍ରୀ ମ୍ୟୁନିସିପାଲ ସରକାରୀ ଉଚ୍ଚ ବିଦ୍ୟାଳୟ, ଭବାନୀପାଟଣା; ମାଣିକେଶ୍ୱରୀ ଉଚ୍ଚ ବିଦ୍ୟାଳୟ, ଭବାନୀପାଟଣା; ଏବଂ ସରକାରୀ ବାଳିକା ଉଚ୍ଚ ବିଦ୍ୟାଳୟ, ଭବାନୀପାଟଣାର ଛାତ୍ରଛାତ୍ରୀମାନେ ଉତ୍ସାହର ସହ ଅଂଶଗ୍ରହଣ କରିଥିଲେ।
ଏହି ନିଆରା ପ୍ରୟାସ ମାଧ୍ୟମରେ କେବଳ ସହିଦଙ୍କ ପରିବାର ପ୍ରତି ସମ୍ମାନ ପ୍ରକାଶ କରାଯାଇନାହିଁ, ବରଂ ନୂତନ ପିଢ଼ି ମନରେ ଦେଶପ୍ରେମ, କୃତଜ୍ଞତା ଓ ବଳିଦାନର ମୂଲ୍ୟବୋଧକୁ ମଧ୍ୟ ସୁଦୃଢ଼ କରିବାର ଏକ ସାର୍ଥକ ପ୍ରୟାସ କରାଯାଇଛି।
Kirti Kiran Mahapatra
