PiN Barta
ଭୁବନେଶ୍ୱର: ଦୀର୍ଘ ୨୩ ବର୍ଷ ଧରି ଚାଲିଥିବା ତାଳଚେର–ବିମଳାଗଡ଼ ନୂତନ ରେଳପଥ ପ୍ରକଳ୍ପର କାମ ଏବେ ସୁଦ୍ଧା ଶେଷ ହୋଇନାହିଁ। ରାଜ୍ୟସଭାରେ ଏହି ପ୍ରକଳ୍ପ ସମ୍ପର୍କିତ ପ୍ରଶ୍ନର ଉତ୍ତର ଦେଇ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ଜମି ଅଧିଗ୍ରହଣ, ବନ ଅନୁମୋଦନ ଓ ଅନ୍ୟାନ୍ୟ ପ୍ରଶାସନିକ ଓ ଆଇନଗତ ବାଧା ଯୋଗୁଁ ପ୍ରକଳ୍ପର ଅଗ୍ରଗତି ପ୍ରଭାବିତ ହେଉଛି। ଏହି କାରଣରୁ ପ୍ରକଳ୍ପ କେବେ ସମ୍ପୂର୍ଣ୍ଣ ହେବ, ସେନେଇ କୌଣସି ନିର୍ଦ୍ଦିଷ୍ଟ ସମୟସୀମା ସରକାର ଘୋଷଣା କରିନାହାନ୍ତି।
୨୦୦୩–୦୪ ରେଳ ବଜେଟରେ ୧୫୦ କିଲୋମିଟର ଲମ୍ବ ବିଶିଷ୍ଟ ଏହି ରେଳପଥ ପ୍ରକଳ୍ପକୁ ₹୭୨୭ କୋଟି ବ୍ୟୟରେ ମଞ୍ଜୁରି ମିଳିଥିଲା। କିନ୍ତୁ ବିଳମ୍ବ ଯୋଗୁଁ ପ୍ରକଳ୍ପର ଆନୁମାନିକ ବ୍ୟୟ ବଢ଼ି ବର୍ତ୍ତମାନ ₹୩,୩୯୦ କୋଟିରେ ପହଞ୍ଚିଛି। ୨୦୨୬ ମାର୍ଚ୍ଚ ସୁଦ୍ଧା ₹୧,୯୦୧ କୋଟି ଖର୍ଚ୍ଚ ହୋଇଥିବାବେଳେ, ୨୦୨୬–୨୭ ଆର୍ଥିକ ବର୍ଷ ପାଇଁ ₹୯୫୦ କୋଟି ବଜେଟ ବ୍ୟବସ୍ଥା କରାଯାଇଛି।
ପ୍ରକଳ୍ପ ପାଇଁ ଆବଶ୍ୟକ ୮୬୩ ହେକ୍ଟର ଜମି ମଧ୍ୟରୁ ୭୫୬ ହେକ୍ଟର ଅଧିଗ୍ରହଣ ସମ୍ପୂର୍ଣ୍ଣ ହୋଇଛି। ତଥାପି ୧୦୭ ହେକ୍ଟର ଜମି ଅଧିଗ୍ରହଣ ବାକି ରହିଛି, ଯେଉଁଥିରେ ୭୭ ହେକ୍ଟର ବେସରକାରୀ, ୫ ହେକ୍ଟର ବନ ଏବଂ ୨୪ ହେକ୍ଟର ସରକାରୀ ଜମି ରହିଛି।
ବର୍ତ୍ତମାନ ସୁଦ୍ଧା ତାଳଚେରରୁ ଖମାର ପର୍ଯ୍ୟନ୍ତ ୪୮ କିଲୋମିଟର ରେଳପଥରେ ଟ୍ରେନ୍ ଚଳାଚଳ ଆରମ୍ଭ ହୋଇସାରିଛି। ଅବଶିଷ୍ଟ ସେକ୍ସନଗୁଡ଼ିକରେ ଜମି ଅଧିଗ୍ରହଣ, ସେତୁ ଓ ରେଳ ଓଭରବ୍ରିଜ୍ ନିର୍ମାଣ କାମ ଚାଲିଛି। ମହୁଲଡିହା–ବିମଳାଗଡ଼ ସେକ୍ସନରେ ବନ ଓ ବନ୍ୟଜନ୍ତୁ ସମ୍ବନ୍ଧୀୟ ଅନୁମୋଦନ ମିଳିବା ପରେ ଉପଲବ୍ଧ ଜମିରେ ନିର୍ମାଣ କାର୍ଯ୍ୟ ଜାରି ରହିଛି।
ରେଳମନ୍ତ୍ରୀଙ୍କ କହିବା ଅନୁସାରେ, ଜମି ଅଧିଗ୍ରହଣ, ବନ ଅନୁମୋଦନ, ୟୁଟିଲିଟି ସ୍ଥାନାନ୍ତର, ଆଇନଗତ ଅନୁମତି, ଭୌଗୋଳିକ ପରିସ୍ଥିତି ଏବଂ ଆଇନ-ଶୃଙ୍ଖଳା ଭଳି ବିଭିନ୍ନ କାରଣ ପ୍ରକଳ୍ପ କାମକୁ ପ୍ରଭାବିତ କରୁଛି। ତେଣୁ ବହୁ ପ୍ରତୀକ୍ଷିତ ଏହି ରେଳପଥ କେବେ ସମ୍ପୂର୍ଣ୍ଣ ହେବ, ତାହାକୁ ନେଇ ଅନିଶ୍ଚିତତା ଜାରି ରହିଛି। ଦୀର୍ଘ ଦୁଇ ଦଶକ ଧରି ଅପେକ୍ଷା କରୁଥିବା ଏହି ଅଞ୍ଚଳର ଲୋକଙ୍କ ପାଇଁ ରେଳମନ୍ତ୍ରଣାଳୟର ଉତ୍ତର ମଧ୍ୟ ସ୍ପଷ୍ଟ ଆଶ୍ୱାସନ ଆଣିପାରିନାହିଁ।
