PiN Barta
ଭୁବନେଶ୍ୱର, ୨୭ ଜୁଲାଇ: ରାଉରକେଲା ବିମାନବନ୍ଦରର ଭିତ୍ତିଭୂମି ସୁଦୃଢ଼ କରିବା ଓ ଯାତ୍ରୀ ସେବାରେ ଉନ୍ନତି ଆଣିବା ପାଇଁ କେନ୍ଦ୍ର ସରକାର ପ୍ରାୟ ୫୮ କୋଟି ୯୬ ଲକ୍ଷ ଟଙ୍କା ବ୍ୟୟ କରିଥିବା ସୂଚନା ମିଳିଛି। ଏହି ବିମାନବନ୍ଦରକୁ କେନ୍ଦ୍ର ସରକାରଙ୍କ ଉଡାନ (UDAN) ଯୋଜନାରେ ସାମିଲ କରାଯାଇ ଆବଶ୍ୟକ ଆର୍ଥିକ ସହାୟତା ପ୍ରଦାନ କରାଯାଇଛି।
ରାଜ୍ୟସଭାରେ ସାଂସଦ ଦିଲ୍ଲୀପ ରାୟଙ୍କ ପ୍ରଶ୍ନର ଉତ୍ତରରେ କେନ୍ଦ୍ର ବେସାମରିକ ବିମାନ ଚଳାଚଳ ରାଷ୍ଟ୍ରମନ୍ତ୍ରୀ ମୁରଲୀଧର ମହୋଲ କହିଛନ୍ତି ଯେ, ଆଞ୍ଚଳିକ ବିମାନ ସଂଯୋଗକୁ ସୁଦୃଢ଼ କରିବା ସହ ବିମାନବନ୍ଦରଗୁଡ଼ିକର ଆଧୁନିକୀକରଣ ଉପରେ କେନ୍ଦ୍ର ସରକାର ନିରନ୍ତର ଗୁରୁତ୍ୱ ଦେଉଛନ୍ତି।
ସେ କହିଛନ୍ତି, ଗ୍ରିନଫିଲ୍ଡ ଏୟାରପୋର୍ଟ ନୀତି ଅନୁଯାୟୀ ନୂତନ ବିମାନବନ୍ଦର ସ୍ଥାପନ ପାଇଁ ରାଜ୍ୟ ସରକାରଙ୍କୁ ପ୍ରଥମେ ଉପଯୁକ୍ତ ସ୍ଥାନ ଚିହ୍ନଟ କରି ବୈଷୟିକ ଅଧ୍ୟୟନ ସହ ପ୍ରସ୍ତାବ ଦାଖଲ କରିବାକୁ ପଡ଼େ। ସମସ୍ତ ଦିଗରୁ ପରୀକ୍ଷା-ନିରୀକ୍ଷା ପରେ ଆବଶ୍ୟକ ମନେହେଲେ କେନ୍ଦ୍ର ସରକାର ଅନୁମୋଦନ ପ୍ରଦାନ କରିଥାନ୍ତି।
ଏହି ପ୍ରସଙ୍ଗରେ ସାଂସଦ ଦିଲ୍ଲୀପ ରାୟ କହିଛନ୍ତି ଯେ, ରାଉରକେଲା ଦ୍ରୁତ ଶିଳ୍ପାୟନର ପଥରେ ଆଗକୁ ବଢ଼ୁଥିବାରୁ ସହରକୁ ବ୍ୟବସାୟୀ, ବିନିଯୋଗକାରୀ ଓ ବିଭିନ୍ନ କ୍ଷେତ୍ରର ପ୍ରତିନିଧିଙ୍କ ଆଗମନ ବଢ଼ୁଛି। ଏଭଳି ପରିସ୍ଥିତିରେ ବିମାନବନ୍ଦରର ଅଧିକ ବିକାଶ ଓ ଦେଶର ବିଭିନ୍ନ ପ୍ରମୁଖ ସହର ସହ ସିଧାସଳଖ ବିମାନ ସେବା ବିସ୍ତାର କରିବା ଆବଶ୍ୟକ ବୋଲି ସେ ମତ ପ୍ରକାଶ କରିଛନ୍ତି।
Kirti Kiran Mahapatra
