Kirti Kiran Mahapatra
ପିନ୍ ବାର୍ତ୍ତା: ମାଲକାନଗିରି ଜିଲ୍ଲାରେ ବିକାଶ ଏବଂ ମହିଳା ସଶକ୍ତିକରଣର ଏକ ନୂତନ ଅଧ୍ୟାୟ ଯୋଡ଼ି ହୋଇଛି । ରାଜ୍ୟର ଅନ୍ୟତମ ଆଦିମ ଜନଜାତି (PVTG) ଭାବେ ପରିଚିତ ବଣ୍ଡା ସମ୍ପ୍ରଦାୟର ସାମଗ୍ରିକ ଉନ୍ନତି ପାଇଁ ମୁଦୁଲିପଡ଼ାସ୍ଥିତ ବଣ୍ଡା ଉନ୍ନୟନ ସଂସ୍ଥା (BDA) ପରିସରରେ ଜିଲ୍ଲାପାଳଙ୍କ ଦ୍ୱାରା ‘ଟ୍ରାଇବାଲ ସ୍କିଲ୍ ସେଣ୍ଟର’ ବା ଜନଜାତି ଦକ୍ଷତା ବିକାଶ କେନ୍ଦ୍ରର ଶୁଭାରମ୍ଭ କରାଯାଇଛି । ପ୍ରଥମ ପର୍ଯ୍ୟାୟରେ କେନ୍ଦ୍ର ସରକାରଙ୍କ ଅଧୀନସ୍ଥ ‘ଜନ ଶିକ୍ଷା ସଂସ୍ଥାନ’ର ସହଯୋଗରେ ୨୦ ଜଣ ବଣ୍ଡା ଜନଜାତି ମହିଳାଙ୍କୁ ବଗିଚା ନିର୍ମାଣ ଏବଂ ପାରମ୍ପରିକ ଅଳଙ୍କାର ତିଆରି ଉପରେ ସ୍ୱତନ୍ତ୍ର ଦକ୍ଷତା ପ୍ରଶିକ୍ଷଣ ଦିଆଯାଉଛି । ଉଲ୍ଲେଖଯୋଗ୍ୟ ଯେ, ବଣ୍ଡା ପାହାଡ଼ର ଏହି ମହିଳାମାନେ ସେମାନଙ୍କର ନିଆରା ପୋଷାକ ଏବଂ ବିଭିନ୍ନ ରଙ୍ଗର ମାଳି ଅଳଙ୍କାର ପାଇଁ ସାରା ବିଶ୍ୱରେ ପ୍ରସିଦ୍ଧ ।
ପ୍ରଶାସନର ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ବଣ୍ଡା ମହିଳାମାନଙ୍କ ପ୍ରାଚୀନ ଓ ପାରମ୍ପରିକ କଳାକୁ ଆଧୁନିକ ବଜାର ସହ ଯୋଡ଼ିବା ସହିତ ସେମାନଙ୍କ ପାଇଁ ନୂତନ ରୋଜଗାରର ପନ୍ଥା ସୃଷ୍ଟି କରିବ । ଏହାଦ୍ୱାରା ସେମାନେ ଆର୍ଥିକ ସ୍ତରରେ ଅଧିକ ସ୍ୱାବଲମ୍ବୀ ଓ ଆତ୍ମନିର୍ଭରଶୀଳ ହେବା ସହ ସେମାନଙ୍କ ଜୀବନଧାରଣ ମାନରେ ବ୍ୟାପକ ସୁଧାର ଆସିପାରିବ ବୋଲି ଲକ୍ଷ୍ୟ ରଖାଯାଇଛି ।
