Kirti Kiran Mahapatra
ପିନ୍ ବାର୍ତ୍ତା: ଓଡ଼ିଶାବାସୀ ବଦଳ ଚାହୁଁଥିଲେ, ଆଉ ଶାସକ ଦଳ ମଧ୍ୟ ବଦଳିଲା । ସରକାର ପରିବର୍ତ୍ତନ ସହ ବିକାଶର ନୂଆ ନାରା ଶୁଣିବାକୁ ମିଳିଲା ଏବଂ ଅନେକ ନୂତନ ପ୍ରକଳ୍ପର ପ୍ରତିଶ୍ରୁତି ମଧ୍ୟ ଦିଆଗଲା । ମାତ୍ର ବାସ୍ତବତା କିନ୍ତୁ ଭିନ୍ନ । ପୂର୍ବ ସରକାର ଅମଳରୁ ଅଧାପନ୍ତରିଆ ହୋଇ ପଡ଼ିରହିଥିବା କୋଟି କୋଟି ଟଙ୍କାର ପ୍ରକଳ୍ପଗୁଡ଼ିକ ଆଜି ବି ସେହିପରି ଅସମ୍ପୂର୍ଣ୍ଣ ଅବସ୍ଥାରେ ଖତଖାଉଛି । ଦୁଇ ବର୍ଷର ଶାସନ କାଳ ମଧ୍ୟରେ ଅନେକ ନୂଆ ଯୋଜନାର ଶିଳାନ୍ୟାସ ହୋଇଥିଲେ ସୁଦ୍ଧା, ସେଗୁଡ଼ିକ ମଧ୍ୟରୁ ଅଧିକାଂଶ କାର୍ଯ୍ୟ ସୀମାହୀନ ବିଳମ୍ବ ଓ ନିମ୍ନମାନର ନିର୍ମାଣ ଯୋଗୁଁ ଅଧାରେ ଅଟକି ରହିଛି । ଅର୍ଥର କୌଣସି ଅଭାବ ନଥାଇ ମଧ୍ୟ ନିର୍ମାଣ କାର୍ଯ୍ୟ ଆଗେଇ ନପାରିବା ପଛରେ ପ୍ରଶାସନିକ ଉଦାସୀନତା, ଠିକାଦାରଙ୍କ ସହ ସାଲିସ୍ ଓ କାମର ନିୟମିତ ତଦାରଖ ନହେବା ମୂଳ କାରଣ ଭାବେ ସାମ୍ନାକୁ ଆସିଛି ।
ତେବେ ଏହି ସମସ୍ତ ବିବାଦୀୟ ଓ ଅଧାପନ୍ତରିଆ ନିର୍ମାଣ ପଛରେ ‘ଆରକେଡି’ (RKD) ନାମକ ଠିକା ସଂସ୍ଥାର ନାମ ବାରମ୍ବାର ଚର୍ଚ୍ଚାକୁ ଆସୁଛି । ପୂର୍ବରୁ କଟକ ଖାନନଗର ସ୍ଥିତ ରିଂ ରୋଡ୍ ବ୍ରିଜ ନିର୍ମାଣ ବେଳେ ଗିର୍ଡର ଭୁଶୁଡ଼ି ୩ ଜଣ ଶ୍ରମିକଙ୍କର ଦୁଃଖଦ ମୃତ୍ୟୁ ଘଟିଥିଲା । ଏହି ଘଟଣାରେ ସରକାରୀ ତଦନ୍ତ ନିର୍ଦ୍ଦେଶ ଦିଆଯାଇଥିଲେ ବି ଉଚ୍ଚପଦସ୍ଥ ଅଧିକାରୀ, ମନ୍ତ୍ରୀ ଓ ସଚିବଙ୍କ ମଧୁଚନ୍ଦ୍ରିକା ଯୋଗୁଁ ମୂଳ ଦୋଷୀଙ୍କୁ ଆଡ଼େଇ ଦିଆଯାଇ ଜଣେ ନିମ୍ନସ୍ତରର କର୍ମଚାରୀଙ୍କୁ ବଳି ପକାଯାଇଥିବା ଅଭିଯୋଗ ହୋଇଛି । ଦୋଷୀ ସଂସ୍ଥା ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ବଦଳରେ ତାକୁ ବାଃ ବାଃ ଦିଆଯିବା ସହ ନୂଆ କାମର ପୁରସ୍କାର ମିଳିବା ନେଇ ବୁଦ୍ଧିଜୀବୀ ମହଲରେ ପ୍ରଶ୍ନ ଉଠିଛି ।
ସେହିପରି ବିଜୁ ଏକ୍ସପ୍ରେସୱେ ଅନ୍ତର୍ଗତ ସିନାପାଲି ଛକ ନିକଟସ୍ଥ ଉଦନ୍ତି ନଦୀ ପୋଲ ନିର୍ମାଣରେ ମଧ୍ୟ ଏହି ସଂସ୍ଥାର ଚରମ ଅବହେଳା ପଦାରେ ପଡ଼ିଥିଲା । ନିମ୍ନମାନର କାର୍ଯ୍ୟ ଯୋଗୁଁ ନବନିର୍ମିତ ବ୍ରିଜଟି ଦବିଯାଇ ଯାତାୟାତ ପାଇଁ ସମ୍ପୂର୍ଣ୍ଣ ଅନୁପଯୁକ୍ତ ହୋଇପଡ଼ିଥିଲା । ଶେଷରେ ସାଧାରଣ ନାଗରିକଙ୍କ ଆକ୍ରୋଶ ପରେ ସମ୍ପୂର୍ଣ୍ଣ ବ୍ରିଜକୁ ଭାଙ୍ଗି ପୁନଃନିର୍ମାଣ କରିବାକୁ ପଡ଼ିଲା । ଲୋକଙ୍କ କୋଟି କୋଟି ଟଙ୍କାର ରାଜସ୍ୱ ପାଣିରେ ପଡ଼ିବା ସତ୍ତ୍ୱେ ଏହି ବିବାଦୀୟ କମ୍ପାନୀକୁ ବ୍ଲାକଲିଷ୍ଟ ନକରି ନିୟମକୁ ଜଳାଞ୍ଜଳି ଦେଇ ଗୋଟିଏ ପରେ ଗୋଟିଏ ପ୍ରକଳ୍ପ ପ୍ରଦାନ କରାଯାଉଛି । ଯାହା କି ସଧାରଣ ଜନତା ଙ୍କ ମଧ୍ୟ୍ୟ ରେ ଅସନ୍ତୋଷ ସୃଷ୍ଟି କରିଛି ।
ବର୍ତ୍ତମାନ ସୁଦ୍ଧା ଏହି ସଂସ୍ଥା ହାତରେ ବାଲେଶ୍ୱର ଜିଲ୍ଲାର ଝାରପୋଖରିଆ-ମାରକୋଣା (ଅଦା ରୋଡ୍), ବାଲେଶ୍ୱର-ଗୁଡ୍ ରୋଡ୍, ଏବଂ ମନକୁଣ୍ଡ-ଭୁଷଣ୍ଡେଶ୍ୱର ଭାୟା ଭୋଗରାଇ ରୋଡର କିଲୋମିଟର ବ୍ୟାପୀ ସଂପ୍ରସାରଣ କାମ ରହିଛି । ମୟୂରଭଞ୍ଜ ଜିଲ୍ଲାର ଟାଙ୍ଗାବିଲ୍ଲା-ସୁକୃଲି ରାସ୍ତା ସହ କନ୍ଧମାଳ ଜିଲ୍ଲାର ଦାରିଂବାଡି-ପାର୍ତ୍ତମହା, ବାଲିଗୁଡା-ବୁଡାଗୁଡା ଏବଂ ମୁସେଲିପଙ୍ଗା-ସିଡିଙ୍ଗିଆ ଭଳି ଗୁରୁତ୍ୱପୂର୍ଣ୍ଣ ରାସ୍ତା ନିର୍ମାଣ ମଧ୍ୟ ଏହି ଏଜେନ୍ସିକୁ ଦିଆଯାଇଛି । ଏହାବ୍ୟତୀତ ଗଞ୍ଜାମ ଜିଲ୍ଲାର ବେଲଗୁଣ୍ଠା-ଗେରେଡା-ଲମ୍ଭେଇ ଓ ଭଞ୍ଜନଗର-ତାରାସିଙ୍ଗି ରାସ୍ତା ଏବଂ ରାଜଧାନୀ ଭୁବନେଶ୍ୱରର ଖଣ୍ଡଗିରି ଛକ ସଂଯୋଗୀକରଣ ଭଳି ପ୍ରମୁଖ ପ୍ରକଳ୍ପଗୁଡ଼ିକ ମଧ୍ୟ ଏହି ସଂସ୍ଥା ନିଜ ନିୟନ୍ତ୍ରଣରେ ରଖିଛି ।
ତଥ୍ୟ ଅନୁସାରେ, ଓଡ଼ିଶାରେ କେବଳ ରାସ୍ତା ଓ ପୋଲ ନୁହେଁ, ବରଂ ଜଳସେଚନ କେନାଲ, ରେଳବାଇ ଓଭରବ୍ରିଜ (ROB) ଏବଂ ସ୍ମାର୍ଟ ସିଟିର ଅନେକ ବଡ଼ ବଡ଼ ସର୍ବସାଧାରଣ ଭିତ୍ତିଭୂମି ପ୍ରକଳ୍ପରେ ମଧ୍ୟ କାମ ନିର୍ଦ୍ଧାରିତ ସମୟସୀମାଠାରୁ ବହୁତ ପଛରେ ଚାଲିଛି । ଅନେକ ସମୟରେ ଠିକାସଂସ୍ଥାଗୁଡ଼ିକ କାମ ହାତେଇବା ପରେ ଅନ୍ୟ ପେଟି-କଣ୍ଟ୍ରାକ୍ଟରଙ୍କୁ ଦାୟିତ୍ୱ ହସ୍ତାନ୍ତର କରି ନିଜେ ଖସିଯାଉଛନ୍ତି, ଯାହାଫଳରେ ନିର୍ମାଣର ମାନ ଅତ୍ୟନ୍ତ ନିମ୍ନସ୍ତରର ହେଉଛି । ଜନସାଧାରଣଙ୍କ ସୁରକ୍ଷାକୁ ବାଜି ଲଗାଇ ଏବଂ ସରକାରୀ କୋଷାଗାରରୁ କୋଟି କୋଟି ଟଙ୍କା ହରିଲୁଟ୍ କରି ବିବାଦୀୟ ଠିକା ସଂସ୍ଥାକୁ କାହିଁକି ବାରମ୍ବାର ଅନୁକମ୍ପା ଦେଖାଯାଉଛି, ତାହାର ସ୍ପଷ୍ଟ ଜବାବ ଦେବାକୁ ଦାବି ହେଉଛି ।
କେବଳ ଭିତ୍ତିଭୂମି ନୁହେଁ, ବରଂ ସ୍ୱାସ୍ଥ୍ୟ, ଶିକ୍ଷା ଓ ଗ୍ରାମୀଣ ବିକାଶ କ୍ଷେତ୍ରରେ ମଧ୍ୟ ସରକାରଙ୍କ ବଡ଼ ବଡ଼ ଦାବି ଓ ବାସ୍ତବତା ମଧ୍ୟରେ ଆକାଶ ପାତାଳ ଫରକ ଦେଖିବାକୁ ମିଳୁଛି । ରାଜ୍ୟର ଅନେକ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଓ ଜିଲ୍ଲା ମୁଖ୍ୟ ଚିକିତ୍ସାଳୟଗୁଡ଼ିକରେ ଡାକ୍ତର ଓ ଆବଶ୍ୟକୀୟ ମେଡିକାଲ ଉପକରଣର ଘୋର ଅଭାବ ରହିଥିବା ବେଳେ, ନୂତନ ମେଡିକାଲ କଲେଜ ଓ ହସ୍ପିଟାଲ ପ୍ରକଳ୍ପଗୁଡ଼ିକର କାର୍ଯ୍ୟ କେବଳ ପ୍ରତିଶ୍ରୁତି ଓ କାଗଜପତ୍ର ମଧ୍ୟରେ ସୀମିତ ହୋଇରହିଛି । ସେହିପରି ଗ୍ରାମାଞ୍ଚଳରେ ପାନୀୟ ଜଳ ଯୋଗାଣ ପାଇଁ ଆରମ୍ଭ ହୋଇଥିବା ମେଗା ପାଇପ୍ ୱାଟର ପ୍ରକଳ୍ପଗୁଡ଼ିକ ବର୍ଷ ବର୍ଷ ଧରି ଅସମ୍ପୂର୍ଣ୍ଣ ହୋଇ ପଡ଼ିରହିଥିବାରୁ ଗ୍ରାମବାସୀ ଆଜି ବି ବିଶୁଦ୍ଧ ପାନୀୟ ଜଳରୁ ବଞ୍ଚିତ ହେଉଛନ୍ତି । ସରକାର ପ୍ରତିଶ୍ରୁତିର ପାହାଡ଼ ଛିଡ଼ା କରୁଛନ୍ତି ସତ, ମାତ୍ର ସାଧାରଣ ଲୋକଙ୍କ ନିକଟରେ ସେବାର ସୁଫଳ ପହଞ୍ଚିବାରେ ନିଷ୍କ୍ରିୟତା ସ୍ପଷ୍ଟ ବାରି ହୋଇପଡ଼ୁଛି ।
ଅପରପକ୍ଷରେ, କୃଷି, ରୋଜଗାର ଓ ଗ୍ରାମୀଣ ଭିତ୍ତିଭୂମି ବିକାଶ ଯୋଜନାଗୁଡ଼ିକ ମଧ୍ୟ ଧୀମା କାର୍ଯ୍ୟଶୈଳୀ ଯୋଗୁଁ ବାଟବଣା ହେବାରେ ଲାଗିଛି । ସରକାର ପ୍ରତିଶ୍ରୁତି ଦେଇଥିବା ନୂଆ ଶୀତଳ ଭଣ୍ଡାର ନିର୍ମାଣ, କୃଷି ସୁବିଧା ସମ୍ପ୍ରସାରଣ ଏବଂ ଯୁବକଯୁବତୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ପ୍ରକ୍ରିୟା ଶାସନତନ୍ତ୍ରର ଲାଲଫିତା ତଳେ ଚାପି ହୋଇରହିଛି । ବଜେଟରେ ଅର୍ଥ ବରାଦ ହେଉଥିଲେ ବି କାର୍ଯ୍ୟକାରିତା ସ୍ତରରେ ସରକାରୀ ବାବୁ ଓ ନେତାଙ୍କ ମଧ୍ୟରେ ସମନ୍ୱୟର ଅଭାବ ଯୋଗୁଁ ପ୍ରକଳ୍ପଗୁଡ଼ିକର ଅଗ୍ରଗତି ଶୂନ । ଏହିସବୁ ବିଳମ୍ବ ଓ ପ୍ରଶାସନିକ ବିଫଳତା ପ୍ରମାଣିତ କରୁଛି ଯେ, ବର୍ତ୍ତମାନର ସରକାର କେବଳ ଭାଷଣ ଓ ନାରାବାଜିରେ ଆଗରେ ରହିଥିବା ବେଳେ ବାସ୍ତବ କ୍ଷେତ୍ରରେ କାମ କରିବାରେ ସମ୍ପୂର୍ଣ୍ଣ ପଛରେ ପଡ଼ିଯାଇଛନ୍ତି ।
