ବରଗଡ଼ ଧନୁଯାତ୍ରା ତୋରଣ ଦୁର୍ନୀତି, ଭିଜିଲାନ୍ସ ତଦନ୍ତ ଦାବି କଲେ ସାଂସଦ ପ୍ରଦୀପ ପୁରୋହିତ

ବରଗଡ଼ ବିଶ୍ୱପ୍ରସିଦ୍ଧ ଧନୁଯାତ୍ରା ସମୟରେ ନିର୍ମିତ ସ୍ୱାଗତ ତୋରଣ ଭାଙ୍ଗିବା ଏବଂ ଏହା ପଛରେ ଥିବା ଆର୍ଥିକ ଅନିୟମିତତାକୁ ନେଇ ଏବେ ରାଜ୍ୟ ରାଜନୀତି ସରଗରମ ହୋଇଛି । ଏହି ନିର୍ମାଣ କାର୍ଯ୍ୟରେ ବ୍ୟାପକ ଦୁର୍ନୀତି ଓ ନିମ୍ନମାନର ସାମଗ୍ରୀ ବ୍ୟବହାର କରାଯାଇଥିବା ଅଭିଯୋଗ ଆଣି ବରଗଡ଼ ବିଜେପି ସାଂସଦ ପ୍ରଦୀପ ପୁରୋହିତ ଏକ ଉଚ୍ଚସ୍ତରୀୟ ଭିଜିଲାନ୍ସ ତଦନ୍ତ ଦାବି କରିଛନ୍ତି । ଏ ନେଇ ସେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏକ ସ୍ମାରକପତ୍ର ପ୍ରଦାନ କରିବା ସହ ଘଟଣାର ନିରପେକ୍ଷ ଅନୁସନ୍ଧାନ ପାଇଁ ଅନୁରୋଧ କରିଛନ୍ତି ।

ଗତ ଧନୁଯାତ୍ରା ସମୟରେ ପୂର୍ତ୍ତ ବିଭାଗ ପକ୍ଷରୁ ସ୍ଥାନୀୟ ଥାନା ଛକଠାରେ ଏକ ଭବ୍ୟ ସ୍ୱାଗତ ତୋରଣ ନିର୍ମାଣ କରାଯାଇଥିଲା । ତେବେ ନିକଟରେ ଏହି ଗେଟ୍‌ଟି ହଠାତ୍ ଭୁଶୁଡ଼ି ପଡ଼ିବାରୁ ଦୁଇ ଜଣ ବ୍ୟକ୍ତି ଆହତ ହୋଇଥିବା ସୂଚନା ମିଳିଛି । ସାଂସଦ ଶ୍ରୀ ପୁରୋହିତ ନିଜ ଚିଠିରେ ଦର୍ଶାଇଛନ୍ତି ଯେ, ଧନୁଯାତ୍ରା ସମୟରେ ଲକ୍ଷ ଲକ୍ଷ ଶ୍ରଦ୍ଧାଳୁ ଓ ପର୍ଯ୍ୟଟକଙ୍କ ଭିଡ଼ ଜମୁଥିବା ବେଳେ ଯଦି ଏହି ଦୁର୍ଘଟଣା ଉତ୍ସବ ସମୟରେ ଘଟିଥାନ୍ତା, ତେବେ ଏକ ବଡ଼ଧରଣର ପ୍ରାଣହାନି ଘଟିଥାନ୍ତା । ଏଭଳି ଘଟଣା କେବଳ ସାଧାରଣ ଲୋକଙ୍କ ଜୀବନକୁ ବିପଦରେ ପକାଉନାହିଁ, ବରଂ ପଶ୍ଚିମ ଓଡ଼ିଶାର ଗର୍ବ ଓ ଗୌରବ କୁହାଯାଉଥିବା ଧନୁଯାତ୍ରାର ସୁନାମରେ ମଧ୍ୟ ଆଞ୍ଚ ଆଣୁଛି । ସେଥିପାଇଁ ସମ୍ପୃକ୍ତ ଅଧିକାରୀ ଓ ଠିକାଦାରଙ୍କ ବିରୋଧରେ କଠୋର ଆଇନଗତ ପଦକ୍ଷେପ ନେବା ସହ ଜିଲ୍ଲାର ଅନ୍ୟ ସମସ୍ତ ସରକାରୀ କୋଠାବାଡ଼ି ଓ ସ୍ଥାୟୀ କିମ୍ବା ଅସ୍ଥାୟୀ ତୋରଣଗୁଡ଼ିକର ସୁରକ୍ଷା ଯାଞ୍ଚ କରିବା ଜରୁରୀ ହୋଇପଡ଼ିଛି ।

ଏହା ବ୍ୟତୀତ ସାଂସଦଙ୍କ ଅଭିଯୋଗ ଅନୁସାରେ, ବରଗଡ଼ ପୂର୍ତ୍ତ ବିଭାଗ ଅଧୀନରେ ହେଉଥିବା ପ୍ରମୁଖ ସରକାରୀ କାର୍ଯ୍ୟଗୁଡ଼ିକରେ ଆଦୌ ସ୍ୱଚ୍ଛତା ରହୁନାହିଁ । ବିଶେଷ କରି ବଡ଼ ବଡ଼ ପ୍ରକଳ୍ପ ପାଇଁ ଅନ୍‌ଲାଇନ୍ ବଦଳରେ ‘ଅଫ୍‌ଲାଇନ୍ ଟେଣ୍ଡର’ ପ୍ରକ୍ରିୟା ଆପଣାଯାଉଛି, ଯାହା ଭ୍ରଷ୍ଟାଚାରକୁ ପ୍ରୋତ୍ସାହନ ଦେଉଛି । ଏହାଦ୍ୱାରା ଅଫିସର ଏବଂ ଠିକାଦାରଙ୍କ ମଧ୍ୟରେ ଅସାଧୁ ମେଣ୍ଟ ସହଜ ହେଉଛି ଏବଂ ନିଜ ପସନ୍ଦର ଲୋକଙ୍କୁ କାର୍ଯ୍ୟାଦେଶ ବଣ୍ଟନ କରାଯାଉଛି । ଶ୍ରୀ ପୁରୋହିତ ଏହି ବ୍ୟବସ୍ଥାକୁ ସମ୍ପୂର୍ଣ୍ଣ ବନ୍ଦ କରି ସମସ୍ତ ସରକାରୀ କାର୍ଯ୍ୟ ପାଇଁ ଇ-ଟେଣ୍ଡରିଂ ବାଧ୍ୟତାମୂଳକ କରିବାକୁ ମୁଖ୍ୟମନ୍ତ୍ରୀଙ୍କ ନିକଟରେ ଦାବି କରିଛନ୍ତି । ଏହି ଘଟଣା ସାମ୍ନାକୁ ଆସିବା ପରେ ରାଜ୍ୟରେ ପୂର୍ବତନ ବିଜେଡି ସରକାର ସମୟର ପ୍ରଶାସନିକ ଶିଥିଳତା ଓ ଦୁର୍ନୀତିକୁ ନେଇ ପୁଣି ଥରେ ରାଜନୈତିକ ଚର୍ଚ୍ଚା ଜୋର ଧରିଛି ।