ହିମନ୍ତ ଓ ଶୁଭେନ୍ଦୁ – ମୋଦିଙ୍କ ପୂର୍ବୋଦୟର ଯୋଦ୍ଧା

ବିଜେପିର ଅଙ୍ଗ, ବଙ୍ଗ, କଳିଙ୍ଗ ଦଖଲ ସ୍ବପ୍ନ ସାକାର ହୋଇଛି । ଇତିମଧ୍ୟରେ ନରେନ୍ଦ୍ର ମୋଦିଙ୍କ ପୂର୍ବୋଦୟର ଯୋଦ୍ଧା ସାଜିଛନ୍ତି ହିମନ୍ତ ବିଶ୍ୱ ଶର୍ମା ଓ ଶୁଭେନ୍ଦୁ ଅଧିକାରୀ । ଉତ୍ତର-ପୂର୍ବରେ ହିମନ୍ତ ଓ ବେଙ୍ଗଲରେ ଶୁଭେନ୍ଦୁ ବିଜେପିର ମଙ୍ଗ ଧରିଛନ୍ତି । ଆସାମରେ ବିଜେପିର ହ୍ୟାଟ୍ରିକ ବିଜୟ ହୋଇଥିବା ବେଳେ ବେଙ୍ଗଲ ଦଖଲ ଶୁଭେନ୍ଦୁଙ୍କ ଯୋଗୁଁ ସମ୍ଭବ ହୋଇପାରିଛି । ଉଭୟ ହିନ୍ଦୁ ଭୋଟ ହାତେଇବାରେ ସଫଳ ହୋଇଥିବା ବେଳେ ସଂଖ୍ୟାଲଘୁ ଭୋଟକୁ ସମ୍ପୂର୍ଣ୍ଣ ଭାଙ୍ଗି ଦେଇଛନ୍ତି । ଉଭୟ ପୂର୍ବୋଦୟ ଦଖଲରେ ମୋଦିଙ୍କ ସାରଥୀ ସାଜିଛନ୍ତି ।

ସଦ୍ୟସମାପ୍ତ ଆସାମ ବିଧାନସଭା ନିର୍ବାଚନରେ ଏନଡିଏ ମେଣ୍ଟର ବିପୁଳ ବିଜୟ ପରେ ଲଗାତାର ଦ୍ବିତୀୟ ଥର ପାଇଁ ହିମନ୍ତ ବିଶ୍ୱଶର୍ମା ଆସାମର ମୁଖ୍ୟମନ୍ତ୍ରୀ ହୋଇଛନ୍ତି । ୧୨୬ ସଦସ୍ୟ ବିଶିଷ୍ଟ ଆସାମ ବିଧାନସଭାରେ ଦୁଇ-ତୃତୀୟାଂଶ ସଂଖ୍ୟା ଗରିଷ୍ଠତା ହାସଲ କରି ବିଜେପି ନେତୃତ୍ୱାଧୀନ ଏନଡିଏ ଲଗାତାର ତୃତୀୟ ଥର ପାଇଁ କ୍ଷମତାକୁ ଫେରିଛି । ହିମନ୍ତ ସ୍ପଷ୍ଟ ଭାବରେ କହିଥିଲେ ଯେ, ତାଙ୍କର ପ୍ରଥମ କାର୍ଯ୍ୟକାଳ କେବଳ ଏକ ଟ୍ରେଲର ଥିଲା, ଏବେ ଆସାମ ବିକାଶର ସମ୍ପୂର୍ଣ୍ଣ ଚିତ୍ର ଦେଖିବ ।

ହିମନ୍ତ ବିଶ୍ୱଶର୍ମା ନିଜ ରାଜନୈତିକ ଜୀବନ ଏକ ଛାତ୍ର ନେତା ଭାବେ ଆରମ୍ଭ କରିଥିଲେ । ୨୦୦୧ରୁ ୨୦୧୫ପର୍ଯ୍ୟନ୍ତ ତରୁଣ ଗୋଗୋଇଙ୍କ ସରକାର ସମୟରେ କ୍ୟାବିନେଟ ମନ୍ତ୍ରୀ ରହିଥିଲେ । ୨୦୧୫ରେ କଂଗ୍ରେସ ଛାଡି ବିଜେପିରେ ସାମିଲ ହୋଇଥିଲେ । କାରଣ ତାଙ୍କ ଭଳି ଜଣେ ହେଭିୱେଟ ନେତାଙ୍କୁ କଂଗ୍ରେସ ରଖିପାରିଲାନି । ଯେଉଁଦିନଠୁ ସେ ବିଜେପିକୁ ଆସିଲେ, ତାଙ୍କ ରଣନୀତିରେ ଉତ୍ତର-ପୂର୍ବକୁ ସମ୍ପୂର୍ଣ୍ଣ ନିଜ ଅକ୍ତିଆରରେ ରଖିବାକୁ ପ୍ରୟାସ ଆରମ୍ଭ କରିଦେଇଥିଲେ । ସେ ଜଣେ ଦକ୍ଷ ସଂଗଠକ ଓ ତୃଣମୂଳସ୍ତରରୁ ହିଁ ସଂଗଠନ ସଜାଡ଼ିବା ଉପରେ ଧ୍ୟାନ ଦିଅନ୍ତି । ତାଙ୍କ କୌଶଳ ଯୋଗୁଁ କେବଳ ଆସାମ ନୁହେଁ, ପୂରା ଉତ୍ତର-ପୂର୍ବରେ ବିଜେପିର ପତିଆରା ବଢିବାକୁ ଲାଗିଲା । ୨୦୨୧ରେ ଆସାମରେ ବିଜେପିର ବଡ଼ ବିଜୟ ପରେ ହିମନ୍ତ ମୁଖ୍ୟମନ୍ତ୍ରୀ ହୋଇଥିଲେ । ବର୍ତ୍ତମାନ ପୁଣି ସେ ମୁଖ୍ୟମନ୍ତ୍ରୀ ଭାବେ କାର୍ଯ୍ୟଭାର ହାତକୁ ନେଇଛନ୍ତି।

ପଶ୍ଚିମବଙ୍ଗ ବିଧାନସଭା ନିର୍ବାଚନର ଫଳାଫଳ ପରେ ସାରା ଦେଶରେ ଯଦି କୌଣସି ଗୋଟିଏ ନାମ ସବୁଠାରୁ ଅଧିକ ଚର୍ଚ୍ଚାରେ ରହିଛି, ସେ ହେଉଛନ୍ତି ଶୁଭେନ୍ଦୁ ଅଧିକାରୀ । ଯିଏ ଦିନେ ମମତା ବାନାର୍ଜୀଙ୍କୁ ମୁଖ୍ୟମନ୍ତ୍ରୀ ପଦରେ ବସାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ, ଆଜି ସେହି ବ୍ୟକ୍ତି ହିଁ ତାଙ୍କୁ କ୍ଷମତାରୁ ହଟାଇବାରେ ମୁଖ୍ୟ ଭୂମିକା ଗ୍ରହଣ କରିଛନ୍ତି । କେବଳ ସେତିକି ନୁହେଁ, ଶୁଭେନ୍ଦୁ ଅଧିକାରୀ ଏଥର ନନ୍ଦିଗ୍ରାମ ସହିତ ମମତା ବାନାର୍ଜୀଙ୍କ ଗଡ଼ ଭବାନୀପୁରରୁ ମଧ୍ୟ ବିଜୟୀ ହୋଇ ଐତିହାସିକ ରେକର୍ଡ ସୃଷ୍ଟି କରିଛନ୍ତି । ୨୦୨୬ ନିର୍ବାଚନରେ ତାଙ୍କ ପାଇଁ ‘କର ବା ମର’ ପରିସ୍ଥିତି ସୃଷ୍ଟି କରିଥିଲା । ସେ ଏଥର ଗୋଟିଏ ନୁହେଁ, ଦୁଇଟି ଆସନ—ନନ୍ଦିଗ୍ରାମ ଓ ଭବାନୀପୁରରୁ ନିର୍ବାଚନ ଲଢ଼ିଥିଲେ । ନନ୍ଦିଗ୍ରାମରେ ସେ ଟିଏମସି ପ୍ରାର୍ଥୀ ପବିତ୍ର କର ଓ ଭବାନୀପୁରରେ ମମତା ବାନାର୍ଜୀଙ୍କୁ ବିପୁଳ ଭୋଟରେ ପରାସ୍ତ କରି ବେଙ୍ଗଲ ରାଜନୀତିର ଏକ ପ୍ରଭାବଶାଳୀ ନେତା ଭାବେ ନିଜ ସ୍ଥାନକୁ ଆହୁରି ସୁଦୃଢ଼ କରିଛନ୍ତି ।

ସୂଚନାଯୋଗ୍ୟ, ୨୦୨୦ ମସିହାରେ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀଙ୍କ ସହ ମତଭେଦ ପରେ ସେ ଟିଏମସି ଛାଡିଥିଲେ। ପରେ ୨୦୨୧ ବିଧାନସଭା ନିର୍ବାଚନ ପୂର୍ବରୁ ସେ ବିଜେପିରେ ଯୋଗଦେଇଥିଲେ । ବେଙ୍ଗଲ ଭୋଟରଙ୍କ ମଧ୍ୟରେ ବିଜେପିର ସ୍ଥିତି ସୁଦୃଢ଼ କରିବା ପାଇଁ ସେ ଦୀର୍ଘଦିନ ଧରି ସକ୍ରିୟ ଭାବେ କାମ କରିଥିଲେ । ସେ ନିଜକୁ ହିନ୍ଦୁତ୍ୱ ରାଜନୀତିର ଏକ ପ୍ରମୁଖ ଚେହେରା ଭାବେ ପ୍ରତିଷ୍ଠିତ କରିଥିଲେ ।