PiN Barta
ଭୁବନେଶ୍ୱର: ଦେଶର ନ୍ୟାୟ ବ୍ୟବସ୍ଥାରେ ବିଚାରାଧୀନ ମାମଲାର ସଂଖ୍ୟା ନେଇ ରାଜ୍ୟସଭାରେ ଉଠିଥିବା ପ୍ରଶ୍ନର ଉତ୍ତରରେ କେନ୍ଦ୍ର ସରକାର ସଦ୍ୟତମ ପରିସଂଖ୍ୟାନ ପ୍ରକାଶ କରିଛନ୍ତି। ରାଜ୍ୟସଭା ସାଂସଦ ଦିଲୀପ କୁମାର ରାୟ ସୁପ୍ରିମକୋର୍ଟ, ବିଭିନ୍ନ ହାଇକୋର୍ଟ ଓ ଜିଲ୍ଲା ଅଦାଲତଗୁଡ଼ିକରେ ଲମ୍ବି ରହିଥିବା ମାମଲା ସମ୍ପର୍କରେ ରାଜ୍ୟଭିତ୍ତିକ ତଥ୍ୟ ଏବଂ ବର୍ଷ ଅନୁସାରେ ବିଚାରାଧୀନ ମାମଲାର ବିବରଣୀ ମାଗିଥିଲେ।
କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରଣାଳୟର ଉତ୍ତର ଅନୁଯାୟୀ, ୧୬ ଜୁଲାଇ ୨୦୨୬ ସୁଦ୍ଧା ଦେଶର ବିଭିନ୍ନ ଅଦାଲତରେ ୫ କୋଟି ୬୪ ଲକ୍ଷରୁ ଅଧିକ ମାମଲା ବିଚାରାଧୀନ ରହିଛି। ଏଥିମଧ୍ୟରୁ ସୁପ୍ରିମକୋର୍ଟରେ ୯୬,୦୨୪ଟି, ହାଇକୋର୍ଟଗୁଡ଼ିକରେ ୬୪.୭୨ ଲକ୍ଷ ଏବଂ ଜିଲ୍ଲା ଓ ଅଧସ୍ତନ ଅଦାଲତଗୁଡ଼ିକରେ ୪.୯୮ କୋଟି ମାମଲା ଲମ୍ବି ରହିଛି।
ଓଡ଼ିଶା ସମ୍ବନ୍ଧୀୟ ତଥ୍ୟ ଅନୁସାରେ, ଓଡ଼ିଶା ଉଚ୍ଚ ନ୍ୟାୟାଳୟରେ ୧,୬୯,୩୨୦ଟି ଏବଂ ଜିଲ୍ଲା ଓ ଅଧସ୍ତନ ଅଦାଲତଗୁଡ଼ିକରେ ୧୮,୬୮,୩୨୩ଟି ମାମଲା ବିଚାରାଧୀନ ଅଛି।
ସରକାର କହିଛନ୍ତି, ମାମଲାର ଶୁଣାଣି ଓ ରାୟ ଦେବା କାର୍ଯ୍ୟ ନ୍ୟାୟପାଳିକାର ଅଧିକାର କ୍ଷେତ୍ରରେ ଥିଲେ ମଧ୍ୟ ବିଚାରାଧୀନ ମାମଲାର ଭାର କମାଇବା ପାଇଁ ବିଭିନ୍ନ ସଂସ୍କାରମୂଳକ ପଦକ୍ଷେପ ଗ୍ରହଣ କରାଯାଉଛି। ଇ-କୋର୍ଟ ଫେଜ୍–୩, ଫାଷ୍ଟ ଟ୍ରାକ୍ ସ୍ପେଶାଲ କୋର୍ଟ, ଏରିୟର୍ସ କମିଟି ଏବଂ ଲୋକ ଅଦାଲତ ସମେତ ବିକଳ୍ପ ବିବାଦ ସମାଧାନ (ADR) ବ୍ୟବସ୍ଥାକୁ ଅଧିକ ସୁଦୃଢ଼ କରିବା ଦିଗରେ କାମ ଚାଲିଛି।
ଏହି ପ୍ରସଙ୍ଗରେ ସାଂସଦ ଦିଲୀପ କୁମାର ରାୟ କହିଛନ୍ତି ଯେ, ଲୋକଙ୍କୁ ସମୟମଧ୍ୟରେ ନ୍ୟାୟ ମିଳିବା ହିଁ ନ୍ୟାୟ ବ୍ୟବସ୍ଥା ପ୍ରତି ବିଶ୍ୱାସକୁ ଦୃଢ଼ କରିଥାଏ। ବିଚାରାଧୀନ ମାମଲାର ସଂଖ୍ୟା ହ୍ରାସ ପାଇଁ ସରକାର ଓ ନ୍ୟାୟପାଳିକାଙ୍କ ପଦକ୍ଷେପ ସକାରାତ୍ମକ ଫଳ ଦେବ ବୋଲି ସେ ଆଶା ବ୍ୟକ୍ତ କରିଛନ୍ତି।
