PiN Barta
ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଥିବା ବେଳେ ବିଦ୍ୟୁତ ଯୋଗାଣକାରୀ ସଂସ୍ଥା ଟାଟା ପାୱାରର ଅତ୍ୟାଚାର ଲୋକଙ୍କ ଉପରେ ଦାଉ ସାଧୁଛି । ରାଜ୍ୟରେ ପ୍ରବଳ ଖରା ଓ ଗୁଳୁଗୁଳି ଲାଗିରହିଛି । ଦିନରେ ପ୍ରଚଣ୍ଡ ଖରା ପରେ ଅପରାହ୍ନରେ କାଳବୈଶାଖୀ ତାଣ୍ଡବ ରଚୁଛି । କାଳବୈଶାଖୀ ଆସିବା ପୂର୍ବରୁ ବିଦ୍ୟୁତ କାଟ ଲୋକଙ୍କ ଜୀବନ ଦୁର୍ବିସହ କରିଦେଇଛି । ରାଜଧାନୀ ଭୁବନେଶ୍ବରରେ ୫ ଘଣ୍ଟା କଟୁଥିବା ବେଳେ ଗ୍ରାମାଞ୍ଚଳ କଥା ନକହିବା ଭଲ । ଯାହା ଫଳରେ ଲୋକେ କଲବଲ ହେଉଛନ୍ତି । ରାଜ୍ୟର ବିଭିନ୍ନ ସ୍ଥାନରେ ବିଦ୍ୟୁତ୍ ସହବରାହ ବ୍ୟାହତ ହେଉଛି । ଏଥିପାଇଁ ବିଭିନ୍ନ ସୋସିଆଲ୍ ମିଡିଆ ପ୍ଲାଟଫର୍ମରେ ଟାଟା ପାୱାର ବିରୋଧରେ ଲୋକେ ଅସନ୍ତୋଷ ଝାଡ଼ୁଛନ୍ତି ।
ରାଜ୍ୟରେ ବିଦ୍ୟୁତ ବିତରଣ ଦାୟିତ୍ୱ ନେଇଥିବା ଟାଟା ପାୱାର ଓ ରାଜ୍ୟ ସରକାରଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁଁ ଓଡ଼ିଶାର ସାଧାରଣ ବିଦ୍ୟୁତ ଉପଭୋକ୍ତା ଶୋଷଣର ଶିକାର ହେଉଥିବା ଅଭିଯୋଗ ହେଉଛି । ରାଜ୍ୟରେ ବାରମ୍ବାର ହେଉଥିବା ଅଘୋଷିତ ବିଦ୍ୟୁତ କାଟ ଜନଜୀବନକୁ ଅସହ୍ୟ କରିଦେଇଛି । ପ୍ରତିଦିନ ହେଉଥିବା ଅଘୋଷିତ ବିଦ୍ୟୁତ କାଟର ସମୟକୁ ଯଦି ହିସାବ କରାଯାଏ, ତେବେ ମାସକୁ ଅତି କମରେ ଗୋଟିଏ ଦିନ ଘର ସମ୍ପୂର୍ଣ୍ଣ ଅନ୍ଧାର ରହୁଛି । ସେହି ସମୟର ବିଦ୍ୟୁତ ବ୍ୟବହାର ନ ହୋଇଥିଲେ ମଧ୍ୟ ଉପଭୋକ୍ତାଙ୍କୁ ସମ୍ପୂର୍ଣ୍ଣ ବିଲ ଦେବାକୁ ପଡୁଛି । ଏହା ସମ୍ପୂର୍ଣ୍ଣ ବେଆଇନ ଓ ଉପଭୋକ୍ତା ବିରୋଧୀ ।
ବର୍ତ୍ତମାନର ବିଜେପି ସରକାର ମଧ୍ୟ ପୂର୍ବତନ ବିଜେଡି ସରକାର ଭଳି ଟାଟା ପାୱାର ପ୍ରତି ସହାନୁଭୂତି ଦେଖାଉଥିବା ଭଳି ମନେ ହେଉଛି । ରାଜ୍ୟରେ ୧ କୋଟିରୁ ଅଧିକ ବିଦ୍ୟୁତ ଉପଭୋକ୍ତା ଥିବା ସତ୍ତ୍ୱେ ସରକାର ସେମାନଙ୍କ ସମସ୍ୟା ପ୍ରତି ଧ୍ୟାନ ଦେଉନାହାନ୍ତି । ଓଡ଼ିଶା ଦେଶର ଦ୍ୱିତୀୟ ସର୍ବାଧିକ ବିଦ୍ୟୁତ ଉତ୍ପାଦନକାରୀ ରାଜ୍ୟ । ରାଜ୍ୟର କୋଇଲା ଓ ଜଳ ସମ୍ପଦ ଆଧାରରେ ବ୍ୟାପକ ବିଦ୍ୟୁତ ଉତ୍ପାଦନ ହେଉଥିଲେ ମଧ୍ୟ ଉପଭୋକ୍ତାମାନେ ଦେଶର ସର୍ବାଧିକ ବିଦ୍ୟୁତ ଦର ଦେବାକୁ ବାଧ୍ୟ ହେଉଛନ୍ତି । ତାଙ୍କ ଅନୁସାରେ, ପ୍ରତି ୟୁନିଟ ବିଦ୍ୟୁତ କ୍ରୟ ଦର ପ୍ରାୟ ଟଙ୍କା ୨.୪୦ ଥିବାବେଳେ ବିକ୍ରୟ ଦର ପ୍ରାୟ ଟଙ୍କା ୭.୬୦କୁ ପହଞ୍ଚିଛି ।
ଓଡ଼ିଶାରେ ପ୍ରାୟ ୯୦୦୦ ମେଗାୱାଟ ବିଦ୍ୟୁତ ଉତ୍ପାଦନ କ୍ଷମତା ଥିବାବେଳେ ବର୍ତ୍ତମାନ ପ୍ରାୟ ୫୫୦୦ ମେଗାୱାଟ ବିଦ୍ୟୁତ ଉତ୍ପାଦିତ ହେଉଛି ଓ ରାଜ୍ୟର ଚାହିଦା ୪୩୦୦ରୁ ୪୭୦୦ ମେଗାୱାଟ ମଧ୍ୟରେ ରହୁଛି । ଏଭଳି ପରିସ୍ଥିତି ସତ୍ତ୍ୱେ ବିଦ୍ୟୁତ ଦର ବଢିଚାଲିଛି । ରାଜ୍ୟର ୧ କୋଟି ୩ ଲକ୍ଷ ବିଦ୍ୟୁତ ଉପଭୋକ୍ତାଙ୍କ ମଧ୍ୟରୁ ପ୍ରାୟ ୩୬ ଲକ୍ଷ ଉପଭୋକ୍ତାଙ୍କର ବିଦ୍ୟୁତ ବ୍ୟବହାର ୨ କିଲୋୱାଟରୁ କମ୍ ଥିବା ସତ୍ତ୍ୱେ ଏନର୍ଜି ଚାର୍ଜ ନାମରେ ଅତିରିକ୍ତ ଦେୟ ଆଦାୟ କରାଯାଉଥିବା ଅଭିଯୋଗ ହୋଇଛି । ସେହିପରି ସ୍ମାର୍ଟ ମିଟର ବ୍ୟବସ୍ଥା ନାମରେ ସାଧାରଣ ଲୋକଙ୍କ ଉପରେ ଅତିରିକ୍ତ ଆର୍ଥିକ ଭାର ପକାଯାଉଛି ।
