PiN Barta
ପିନ୍ ବାର୍ତ୍ତା: କୋଷ୍ଟାଲ ହାଇୱେ ପ୍ରକଳ୍ପକୁ ନେଇ ରାଜ୍ୟରେ ରାଜନୈତିକ ବିବାଦ ତୀବ୍ର ହୋଇଥିବାବେଳେ ବିଜେଡିର ବରିଷ୍ଠ ଉପସଭାପତି ସଞ୍ଜୟ କୁମାର ଦାସବର୍ମାଙ୍କ ମତାମତକୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି । କୋଷ୍ଟାଲ ହାଇୱେର ମୂଳ ପରିକଳ୍ପନାରୁ କେନ୍ଦ୍ର ସରକାର ଦୂରେଇ ଯାଇଥିବା ଅଭିଯୋଗ କରି ସଞ୍ଜୟ ଦାସବର୍ମା ଏହାକୁ ଓଡ଼ିଶାର ପର୍ଯ୍ୟଟନ, ଅର୍ଥନୀତି ଓ ଉପକୂଳ ଅଞ୍ଚଳର ବିକାଶ ପ୍ରତି ଅବହେଳା ବୋଲି କହିଛନ୍ତି । ଅନ୍ୟପଟେ ରାଜ୍ୟ ସରକାରଙ୍କ ପକ୍ଷରୁ ତାଙ୍କ ଅଭିଯୋଗକୁ ଖଣ୍ଡନ କରାଯାଇ ବିଜେଡିକୁ ହିଁ ପ୍ରକଳ୍ପ ବିଳମ୍ବ ପାଇଁ ଦାୟୀ କରାଯାଇଛି ।
ଦୀର୍ଘ ୧୧ ବର୍ଷ ପରେ କେନ୍ଦ୍ର କ୍ୟାବିନେଟ୍ କୋଷ୍ଟାଲ ହାଇୱେ ପ୍ରକଳ୍ପର ରାମେଶ୍ୱର-କୋଣାର୍କ ଏବଂ କୋଣାର୍କ-ପାରାଦୀପ ଅଂଶ ପାଇଁ ଅନୁମୋଦନ ଦେଇଛି । ହେଲେ ସଞ୍ଜୟ ଦାସବର୍ମାଙ୍କ କହିବା ଅନୁସାରେ, ୨୦୧୫ ମସିହାରେ ନିତିନ ଗଡକରୀ ଗୋପାଳପୁରରୁ ଦୀଘା ପର୍ଯ୍ୟନ୍ତ ପ୍ରାୟ ୪୫୦ କିଲୋମିଟର ଦୀର୍ଘ କୋଷ୍ଟାଲ ହାଇୱେ ନିର୍ମାଣର ଘୋଷଣା କରିଥିଲେ । କିନ୍ତୁ ବର୍ତ୍ତମାନର ମଞ୍ଜୁରୀରେ ପାରାଦୀପରୁ ଦୀଘା ପର୍ଯ୍ୟନ୍ତ ଭଦ୍ରକ ଓ ବାଲେଶ୍ୱର ଜିଲ୍ଲାର ବିସ୍ତୃତ ଉପକୂଳ ଅଞ୍ଚଳ ବାଦ ପଡ଼ିଛି, ଯାହା ଓଡ଼ିଶାବାସୀଙ୍କ ଆଶାକୁ ନିରାଶ କରିଛି ।
ବିଜେଡିର ଅଭିଯୋଗ ଅନୁଯାୟୀ, ପ୍ରକଳ୍ପ ଘୋଷଣା ପରଠାରୁ ବାରମ୍ବାର ଆଲାଇନମେଣ୍ଟ ପରିବର୍ତ୍ତନ, ଟେଣ୍ଡର ବାତିଲ ଏବଂ ପ୍ରଶାସନିକ ଅବହେଳା ଯୋଗୁଁ ଏହାର ଅଗ୍ରଗତି ବାଧାପ୍ରାପ୍ତ ହୋଇଛି । ଚିଲିକା ଓ ଭିତରକନିକା ଅଞ୍ଚଳର ପରିବେଶଗତ ଅନୁମୋଦନ ସମସ୍ୟା ମଧ୍ୟ ପ୍ରକଳ୍ପକୁ ଜଟିଳ କରିଥିବା ଦଳ କହିଛି । ସଞ୍ଜୟ ଦାସବର୍ମାଙ୍କ ମତରେ, ମୂଳ ଯୋଜନା ଅନୁଯାୟୀ ସମୁଦ୍ର ଉପକୂଳ ନିକଟରେ ରାଜପଥ ନିର୍ମାଣ ହୋଇଥାନ୍ତା ତାହେଲେ ପର୍ଯ୍ୟଟନ ବିକାଶ, ବାତ୍ୟା ମୁକାବିଲା ଓ ଗମନାଗମନ କ୍ଷେତ୍ରରେ ବଡ଼ ପରିବର୍ତ୍ତନ ଆସିଥାନ୍ତା । ବର୍ତ୍ତମାନ ମଞ୍ଜୁରୀ ପାଇଥିବା ରୁଟ୍ରେ ସମୁଦ୍ର ଓ ଚିଲିକାର ପର୍ଯ୍ୟଟନ ସମ୍ଭାବନା ଆଶାନୁରୂପ ନାହିଁ । ତେଣୁ ଗୋପାଳପୁରରୁ ଦୀଘା ପର୍ଯ୍ୟନ୍ତ ମୂଳ ଡିପିଆରକୁ ପୁନଃବିଚାର କରି ତାହାକୁ କାର୍ଯ୍ୟକାରୀ କରିବାକୁ ସେ ଦାବି କରିଛନ୍ତି।
ଅନ୍ୟପଟେ ରାଜ୍ୟ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ବିଜେଡିର ଅଭିଯୋଗକୁ ତୀବ୍ର ଭାବେ ଖଣ୍ଡନ କରିଛନ୍ତି । ତାଙ୍କ କହିବା ଅନୁସାରେ, ବର୍ତ୍ତମାନର ରୁଟ୍ ଚିଲିକା ଓ ଉପକୂଳ ଅଞ୍ଚଳକୁ ସଂଯୋଗ କରୁଛି ଏବଂ ଏହା ପର୍ଯ୍ୟଟନ ଓ ଅର୍ଥନୈତିକ ବିକାଶ ପାଇଁ ସହାୟକ ହେବ । ସେ ଅଭିଯୋଗ କରିଛନ୍ତି ଯେ, ପୂର୍ବରୁ ବିଜେଡି ସରକାର ବିଭିନ୍ନ କାରଣରୁ କୋଷ୍ଟାଲ ହାଇୱେ ପ୍ରକଳ୍ପକୁ ଆଗକୁ ବଢ଼ିବାକୁ ଦେଇନଥିଲା । ପ୍ରଧାନମନ୍ତ୍ରୀଙ୍କ ପୂର୍ବୋଦୟ ବିକାଶ ଦୃଷ୍ଟିକୋଣ ଅନୁସାରେ ଓଡ଼ିଶାର ଭିତ୍ତିଭୂମି ବିକାଶକୁ ପ୍ରାଥମିକତା ଦିଆଯାଉଛି । କେନ୍ଦ୍ର ସଡ଼କ ପରିବହନ ମନ୍ତ୍ରୀ ନିତିନ ଗଡକରୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ରାଜ୍ୟ ସରକାରଙ୍କ ନିରନ୍ତର ପ୍ରୟାସ ଯୋଗୁଁ ଏହି ପ୍ରକଳ୍ପ ଅନୁମୋଦନ ପାଇଥିବା ସେ ଦାବି କରିଛନ୍ତି ।
କୋଷ୍ଟାଲ ହାଇୱେକୁ ନେଇ ବିଜେଡି ଓ ବିଜେପି ମଧ୍ୟରେ ଆରମ୍ଭ ହୋଇଥିବା ଏହି ରାଜନୈତିକ ଯୁଦ୍ଧ ଆଗାମୀ ଦିନରେ ଆହୁରି ତୀବ୍ର ହେବାର ସମ୍ଭାବନା ରହିଛି । ପ୍ରକଳ୍ପର ମୂଳ ରୂପରେଖ, ରୁଟ୍ ଚୟନ ଓ ଉପକୂଳ ଜିଲ୍ଲାଗୁଡ଼ିକର ଭବିଷ୍ୟତ ବିକାଶକୁ ନେଇ ଉଭୟ ଦଳ ଏବେ ପରସ୍ପରକୁ ଦୋଷାରୋପ କରୁଥିବାବେଳେ ଏହା ରାଜ୍ୟ ରାଜନୀତିର ଏକ ପ୍ରମୁଖ ପ୍ରସଙ୍ଗ ଭାବେ ଉଭା ହୋଇଛି ।
Kirti Kiran Mahapatra
