PiN Barta
ଓଡ଼ିଶାରେ ପ୍ରଥମ ଥର ପାଇଁ ଭାରତୀୟ ଜନତା ପାର୍ଟିର ସରକାର ଗଠନ ପଛରେ ଗଞ୍ଜାମ ଜିଲାର ଏକ ଗୁରୁତ୍ବପୂର୍ଣ୍ଣ ଅବଦାନ ରହିଛି । କାରଣ ଏହି ଜିଲାର ୧୩ଟି ବିଧାନସଭା ନିର୍ବାଚନ ମଣ୍ଡଳୀରୁ ୧୧ଟିରେ ବିଜେପି ଜିତିଥିଲା । ଯାହା ଏକ ବହୁମତ ସରକାର ଗଠନରେ ବେଶ୍ ସାହାଯ୍ୟ କରିଥିଲା । ଏକଦା ବିଜେଡିର ଗଡ଼ ଥିବା ଏହି ଜିଲାରେ ବିଜେପି ଏକତରଫା ଜିତିଥିଲେ ମଧ୍ୟ ନିର୍ବାଚନ ପରେ ଦଳ ତୀବ୍ର ଗୋଷ୍ଠୀ କନ୍ଦଳ ଭିତରେ ରହିଛି । ବିଶେଷକରି ସାଂସଦ ଏବଂ ବିଧାୟକଙ୍କ ଭିତରେ ଝଗଡ଼ା ଏବେ ଦାଣ୍ଡରେ ପଡ଼ି ହାଟରେ ଗଡ଼ୁଛି। ଉଭୟ ବ୍ରହ୍ମପୁର ଏବଂ ଆସିକା ସଂସଦୀୟ କ୍ଷେତ୍ରରେ ସମାନ ସ୍ଥିତି ଦେଖିବାକୁ ମିଳିଛି ।
୧୯୭୭ ମସିହାରେ ଆସିକା ସଂସଦୀୟ କ୍ଷେତ୍ର ଗଠନ ହେବା ପରେ ଗତ ନିର୍ବାଚନରେ ପ୍ରଥମ ଥର ପାଇଁ ବିଜେପି ଏଥିରେ ଜିତିଛି । ସାଂସଦ ଭାବେ ନିର୍ବାଚିତ ହୋଇଛନ୍ତି ଅନିତା ଶୁଭଦର୍ଶନୀ ପଟ୍ଟନାୟକ । ୨୦୧୯ ମସିହା ନର୍ବାଚନରେ ଦୁଇ ଲକ୍ଷରୁ ଅଧିକ ଭୋଟ୍ରେ ପରାସ୍ତ ହୋଇଥିବା ଅନିତା କିନ୍ତୁ ୨୦୨୪ ମସିହାରେ ପ୍ରାୟ ଲକ୍ଷେ ଭୋଟ୍ରେ ବିଜୟୀ ହୋଇଥିଲେ । ସେହିଭଳି ଏହି ସଂସଦୀୟ କ୍ଷେତ୍ର ଅଧିନରେ ଥିବା ୭ଟି ବିଧାନସଭା ନିର୍ବାଚନ ମଣ୍ଡଳୀ ଭିତରୁ ୫ଟିରେ ବିଜେପି ଜିତିଛି। କିନ୍ତୁ କୁହାଯାଉଛି, ନିର୍ବାଚନ ପରଠୁ ସାଂସଦ ଏବଂ ବିଧାୟକଙ୍କ ଭିତରେ ତିକ୍ତତା ସୃଷ୍ଟି ହୋଇଥିଲା । ତାହା କ୍ରମଶଃ ବଢ଼ି ବଢ଼ି ଗୁରୁତର ଅବସ୍ଥାକୁ ଗଲାଣି ।
ବିଜେପି ଦଖଲରେ ଥିବା ସମସ୍ତ ୫ଟି ବିଧାନସଭା ଯଥା ଆସିକା, କବିସୂର୍ଯ୍ୟନଗର, ଖଲିକୋଟ ଏବଂ ପୋଲସରା ନିର୍ବାଚନ ମଣ୍ଡଳୀରେ ସାଂସଦ ଏବଂ ବିଧାୟକଙ୍କ ଗୋଷ୍ଠୀ ଭିତରେ କେଉଁଠି ଶୀତଳ ଯୁଦ୍ଧ ଚାଲିଥିବା ବେଳେ ଆଉ କେଉଁଠି ଖୋଲାଖୋଲି ଝଗଡ଼ା ଚାଲିଛି । ପରିସ୍ଥିତି ଏମିତି ହେଲାଣି ଯେ, ବିଜେପି କର୍ମୀଙ୍କୁ ଦେଖିଲେ ଲୋକେ ପଚାରୁଛନ୍ତି ‘ତୁମେ କେଉଁ ଗୋଷ୍ଠୀର ?’ । ସାଂସଦ ଅନିତା ପଟ୍ଟନାୟକ ବିଭିନ୍ନ ନିର୍ବାଚନ ମଣ୍ଡଳୀ ଗଲେ ମଧ୍ୟ ସ୍ଥାନୀୟ ବିଧାୟକଙ୍କୁ ଭେଟୁ ନାହାନ୍ତି । ନିଜସ୍ଵ ସମର୍ଥକଙ୍କୁ ନେଇ କାର୍ଯ୍ୟକ୍ରମ ଆୟୋଜନ କରୁଛନ୍ତି । ଉଦାହରଣ ହେଲା, ଗତ ୨୦ ତାରିଖରେ ସାଂସଦ ଯାଇଥିଲେ ଖଲ୍ଲିକୋଟ । ପୂର୍ତ୍ତ ବିଭାଗର ଡାକବଙ୍ଗଳାରେ ବିଭିନ୍ନ ପଞ୍ଚାୟତର ଜନପ୍ରତିନିଧି ଏବଂ ଦଳୀୟ କର୍ମୀଙ୍କ ସହିତ ଆଲୋଚନା କଲେ । ସେଇ ଦିନ ହିଁ ଖଲ୍ଲିକୋଟ ବିଧାୟକ ପୂର୍ଣ୍ଣ ଚନ୍ଦ୍ର ସେଠୀ ବଡ଼ ମିଶ୍ରଣ ପର୍ବ ଆୟୋଜନ କଲେ । କିନ୍ତୁ ବିଧାୟକଙ୍କ କାର୍ଯ୍ୟକ୍ରମକୁ ସାଂସଦ ଗଲେ ନାହିଁ କିମ୍ବା ସାଂସଦଙ୍କ କାର୍ଯ୍ୟକ୍ରମକୁ ବିଧାୟକ ଗଲେ ନାହିଁ ।
କବିସୂର୍ଯ୍ୟନଗର ନିର୍ବାଚନ ମଣ୍ଡଳୀ ଘଟଣା ଆହୁରି ରୋଚକ । ଗତ ୨୬ ତାରିଖରେ ଦୁଇଟି ରାସ୍ତା ଭିତ୍ତି ପ୍ରସ୍ଥର କାର୍ଯ୍ୟକ୍ରମ ଥିଲା । ଉଭୟ କାର୍ଯ୍ୟକ୍ରମର ଫଳକରେ ସାଂସଦଙ୍କ ନାଁ ନଥିଲା । ତାଙ୍କ ସମର୍ଥକମାନେ ଫଳକ ଭାଙ୍ଗି ଦେଲେ । ଫଳକ ଭାଙ୍ଗିବା ପରେ ବିଧାୟକ ପ୍ରତାପ ଚନ୍ଦ୍ର ନାୟକ ଏକ ଫ୍ଳେକ୍ସ ଲଗାଇ ଭିତ୍ତି ପ୍ରସ୍ଥର ପକାଇଥିଲେ ।
ପୋଲସରା ବିଧାୟକ ତଥା ମନ୍ତ୍ରୀ ଗୋକୁଳାନନ୍ଦ ମଲ୍ଲିକଙ୍କ ସହିତ ପୁରୁଣା ବିବାଦ । କାରଣ ଏହି ନିର୍ବାଚନ ମଣ୍ଡଳୀରୁ ଏକଦା ଅନିତାଙ୍କ ବାପା ତଥା ତତ୍କାଳୀନ ‘ଗଞ୍ଜାମ ଟାଇଗର୍’ ରାମକୃଷ୍ଣ ପଟ୍ଟନାୟକ ଏବଂ ମା’ କୁମୁଦିନୀ ପଟ୍ଟନାୟକ ନିର୍ବାଚନ ଲଢ଼ୁଥିଲେ । ଏପରିକି ୨୦୧୪ ମସିହାରେ କୁମୁଦିନୀ ପଟ୍ଟନାୟକ ବିଜେପିରୁ ପ୍ରାର୍ଥୀ ହୋଇଥିବା ବେଳେ ତାଙ୍କ ବିରୋଧରେ ସେହି ସମୟରେ କଂଗ୍ରେସରୁ ପ୍ରାର୍ଥୀ ହୋଇଥିଲେ ଗୋକୁଳାନନ୍ଦ ମଲ୍ଲିକ । ଏଣୁ ଉଭୟଙ୍କ ଭିତରେ ତିକ୍ତତା ବହୁ ପୁରୁଣା । କେବଳ ଏହି ତିନୋଟି ନିର୍ବାଚନ ମଣ୍ଡଳୀ ନୁହଁ, ଆସିକା ବିଧାୟକ ସରୋଜ ପାଢ଼ୀ ଏବଂ ସୋରଡ଼ା ବିଧାୟକ ନୀଳମଣି ବିଷୋୟୀଙ୍କ ସହିତ ମଧ୍ୟ ସାଂସଦ ଅନିତା ଶୁଭଦର୍ଶନୀଙ୍କ ସମ୍ପର୍କ ଭଲ ନାହିଁ । ଆଗାମୀ ଦିନରେ ସାଂସଦ ଏବଂ ବିଧାୟକମାନଙ୍କ ଭିତରେ କନ୍ଦଳ ଆହୁରି ଉଗ୍ର ହେବ ବୋଲି ଆଶଙ୍କା କରାଯାଉଛି ।
