ରଥଯାତ୍ରା ପରର ଆତ୍ମଚିନ୍ତନ

ସୁଦାମ ଶେଖର (ପିନ୍ ବାର୍ତ୍ତା): ବିଶ୍ୱପ୍ରସିଦ୍ଧ ରଥଯାତ୍ରା ସଦ୍ୟ ସମାପ୍ତ ହୋଇଛି । ଆରମ୍ଭରୁ ଅନେକ ବିଭ୍ରାଟ ଦେଖିବାକୁ ମିଳିଛି ସରକାର ଓ ପ୍ରଶାସନର ଜୋରଦାର ପ୍ରସ୍ତୁତି ସତ୍ତ୍ୱେ । ବିଶ୍ୱପ୍ରସିଦ୍ଧ ରଥଯାତ୍ରା ପୁରୀକୁ ସମଗ୍ର ପୃଥିବୀର ବିଭିନ୍ନ ଦେଶରୁ ଭକ୍ତ ମାନେ ଛୁଟି ଆସନ୍ତି ରଥାରୂଢ ମହାପ୍ରଭୁଙ୍କ ଦର୍ଶନ ଲାଭ କରିବା ପାଇଁ । ରଥ ନିର୍ମାଣ ସମୟରେ ଅବଶିଷ୍ଟ ଚାରି ଫୁଟରୁ କମ୍ କାଠ ପାଇଁ ମହାରଣାମାନଙ୍କ କାମ ବନ୍ଦ ହେବା ଉଚିତ ନ ଥିଲା । ପ୍ରଶାସନର ହସ୍ତକ୍ଷେପ ପରେ ତିନି ରଥ ଅତିସୁନ୍ଦର ଭାବେ ଗଢ଼ା ହେଇଥିଲା । ରଥଯାତ୍ରା ଦିନ ପ୍ରବଳ ବର୍ଷାରେ ମହାପ୍ରଭୁଙ୍କ ଟାହିଆ ପହଣ୍ଡି ସମୟରେ ହିଁ ଗଳି ପଡ଼ିଲା । ବିନା ଟାହିଆରେ ମହାପ୍ରଭୁ ବିଜେ କଲେ । ଭକ୍ତଙ୍କର ବିଷଣ୍ଣ ମୁହଁ ଓ ଅସନ୍ତୋଷ ଦେଖିବାକୁ ମିଳିଥିଲା । ପାଣିପାଗ ପ୍ରତିକୂଳ ଥିବା ଜାଣି ମଧ୍ୟ ବିକଳ୍ପ ଟାହିଆ ବ୍ୟବସ୍ଥା କରାଯିବା ଆବଶ୍ୟକ ଥିଲା । ପ୍ରଶାସନ ତାହା ନ କରି ଏଭଳି ବିନା ଟାହିଆରେ ପୂର୍ବରୁ ବି ପହଣ୍ଡି ବିଜେ ହେଇଛି କହି ଖସିଗଲେ ।

ସରକାରଙ୍କ ଅଭୂତପୂର୍ବ ବ୍ୟବସ୍ତା ସତ୍ତ୍ୱେ ଠେଲା ପେଲା ଦଳାଚକଟା ଦେଖିବାକୁ ମିଳିଥିଲା । ଶହ ଶହ ଲୋକ ଆହତ ହୋଇଥିବା ଖବର ଆସିଲା । ତିନି ଜଣ ଭକ୍ତଙ୍କ ମୃତ୍ୟୁ ଖବର ସମସ୍ତଙ୍କୁ ବ୍ୟଥିତ କରିଥିଲା । ବାହୁଡା ଯାତ୍ରାରେ ସେହିପରି ଜଣେ ଭକ୍ତ ମୃତ୍ୟୁ ବରଣ କଲେ । ସୁନାବେଶ, ଅଧରପଣା ନୀତି ଓ ନିଳାଦ୍ରୀବିଜେ ବି ସରିଲା । କିନ୍ତୁ କର୍ଡନ ଭିତରକୁ କିଛି ଭକ୍ତ ପଶି ଯିବା ଓ ପାସ ବ୍ୟବସ୍ଥା ଜଣେ ଭକ୍ତକୁ ଅଧିକ ମର୍ମାହତ କଲା ।

ସେ ଭକ୍ତର ଭଗବାନ। ଭକ୍ତଙ୍କୁ ଦର୍ଶନ ଦେବାପାଇଁ ବଡ଼ ଦାଣ୍ଡକୁ ଆସନ୍ତି ବର୍ଷକୁ ଥରେ । ମନରେ କେତେ ଆଶା ଆକାଂକ୍ଷା ନେଇ କେତେ ଦୂରରୁ ଆସିଥିବା ଭକ୍ତ ଦର୍ଶନ ପାଇବା ଅପେକ୍ଷା ପାସଧାରୀ ଭକ୍ତ ଦର୍ଶନ ଭଲରେ ଦର୍ଶନ କରିବା ଭକ୍ତଙ୍କ ମଧ୍ୟରେ ପାତରଅନ୍ତର ନୁହେଁ କି ? ଅତିବିଶିଷ୍ଟ ଭକ୍ତ, ଯେଉଁ ମାନଙ୍କୁ ଭି ଭି ଆଇ ପି ଭକ୍ତ ବୋଲି କୁହାଯାଏ, ସେମାନଙ୍କ ଲାଗି ସାଧାରଣ ଭକ୍ତଙ୍କର ଦର୍ଶନରେ ବଡ଼ ବ୍ୟାଘାତ ହେବା ଦେଖିବାକୁ ମିଳିଥିଲା । ଅତିବିଶିଷ୍ଟ ଭକ୍ତମାନେ ସତେ ଯେପରି ରଥଯାତ୍ରା ଉପଭୋଗ କରି ଫେରିଥିବା ବେଳେ, ସାଧାରଣ ଭକ୍ତ ଅନେକ ତିକ୍ତ ଅନୁଭୂତି ନେଇ ଫେରିବା ସାର ହେଲା ।

ଅଣସେବାୟତ ମାନେ ରଥ ଉପରକୁ ଚଢ଼ିଯିବା ଏବଂ ମୁଖ୍ୟପ୍ରଶାସକ ତାଙ୍କୁ ରଥ ଉପରୁ ଧକ୍କାମାରି ବାହାର କରିବା ବେଶ ରୋଚକ ଲାଗୁଥିଲେ ବି ଏତେ କଡ଼ା କଟକଣା ମଧ୍ୟରେ ମଧ୍ୟ ଏମାନେ ସେ ବ୍ୟୁହ ଭେଦକରି ରଥ ଉପରକୁ ଗଲେ କିପରି ? ଏପରି ଅନେକ ଅସମାହିତ ପ୍ରଶ୍ନ ଉଙ୍କି ମାରୁଛି ମନରେ । ତଥାପି ସାଧାରଣ ଭକ୍ତ ଯନ୍ତ୍ରଣା, କଷ୍ଟ ପାଇ ଭକ୍ତି ଭାବ ରେ ଦର୍ଶନ କଲେ ମଧ୍ୟ ସରକାର ଓ ପ୍ରଶାସନ “ସବୁ ତାଙ୍କରି ଲୀଳା । ସବୁ ତାଙ୍କରି ଇଚ୍ଛା” କହି ଖସି ନ ଯାଉ । ଆଗକୁ ଆହୁରି ଅଧିକ ସମସ୍ୟା ବି ଆସିପାରେ ।

ଜୟ ଜଗନ୍ନାଥ 🙏