PiN Barta
ବିସ୍ଥାପିତଙ୍କୁ ସେମାନଙ୍କ ନାଯ୍ୟ ଦାବି ଦେବା ପାଇଁ ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ଜୋରଦାର ଲଢେଇ ଜାରି ରଖିଛନ୍ତି । ବିସ୍ଥାପିତ ଓ ପ୍ରଭାବିତ ଲୋକଙ୍କୁ ନ୍ୟାୟ ଦେବା ଲକ୍ଷ୍ୟରେ ପ୍ରଦେଶ କଂଗ୍ରେସ ପକ୍ଷରୁ ‘ଗାନ୍ଧୀ ପଥେ ନ୍ୟାୟ ପଦଯାତ୍ରା’ ଅନୁଷ୍ଠିତ ହୋଇଛି । ଜଗତସିଂହପୁର ଜିଲ୍ଲାର ଢିଙ୍କିଆରୁ ଆରମ୍ଭ ହୋଇଥିବା ଏହି ପଦଯାତ୍ରା ଭୁବନେଶ୍ୱର ରେ ଶେଷ ହୋଇଛି । ବିଭିନ୍ନ ଘରୋଇ କମ୍ପାନୀଙ୍କ ଶୋଷଣ ଏବଂ ବିସ୍ଥାପନ ନୀତି ବିରୋଧରେ ଏହି ଆନ୍ଦୋଳନ ହୋଇଥିବା ବେଳେ ପ୍ରବଳ ଗରମ ଓ ଗ୍ରୀଷ୍ମପ୍ରବାହ ସତ୍ତ୍ୱେ ପିସିସି ସଭାପତିଙ୍କ ଏ ପଦଯାତ୍ରା ଜନତାଙ୍କୁ ପ୍ରଭାବିତ କରିବାରେ ସମର୍ଥ ହୋଇଛି ।
କଂଗ୍ରେସର ଅଭିଯୋଗ ଅନୁଯାୟୀ, ଢିଙ୍କିଆ, ନୂଆଗାଁ ଓ ଗଡକୁଜଙ୍ଗ ଅଞ୍ଚଳରେ ପ୍ରାୟ ୨୦ ବର୍ଷ ଧରି ଶିଳ୍ପ ସଂସ୍ଥାମାନଙ୍କ ସ୍ୱାର୍ଥ ପାଇଁ ସରକାର ଓ ଜିଲ୍ଲା ପ୍ରଶାସନ ସାଧାରଣ ଲୋକଙ୍କ ଉପରେ ଅନ୍ୟାୟ ଓ ଜୁଲୁମ କରିଆସୁଛନ୍ତି । ଏହାର ପ୍ରତିବାଦ ସ୍ୱରୂପ ଏହି ପଦଯାତ୍ରା କରାଯାଇଛି । ଢିଙ୍କିଆ ଅଞ୍ଚଳ ଧାନ, ପାନ ଓ ମତ୍ସ୍ୟ ଉତ୍ପାଦନ ପାଇଁ ପରିଚିତ । ଏଠାକାର ଲୋକମାନେ ଜୀବନଜୀବିକା ଓ ଭିଟାମାଟି ପ୍ରତି ଅତ୍ୟନ୍ତ ସମ୍ବେଦନଶୀଳ ଥିବାବେଳେ ୨୦୦୫ ମସିହାରୁ ନିଜ ଜମି ରକ୍ଷା ପାଇଁ ସଂଗ୍ରାମ କରିଆସୁଛନ୍ତି । ଏହି ଆନ୍ଦୋଳନ ସମୟରେ ଚାରିଜଣଙ୍କ ମୃତ୍ୟୁ ଘଟିଥିବା ସହ ହଜାର ହଜାର ଲୋକଙ୍କ ନାମରେ ମାମଲା ରୁଜୁ ହୋଇଛି ।
ରାଜ୍ୟରେ ପ୍ରାୟ ୨୦ ଲକ୍ଷ ହିତାଧିକାରୀ ଜମି ପଟ୍ଟା ପାଇବାର ହକଦାର ଥିବାବେଳେ ଏପର୍ଯ୍ୟନ୍ତ ସେମାନେ ସେମାନଙ୍କର ଅଧିକାର ପାଇନାହାନ୍ତି । ସରକାର ଲକ୍ଷ ଲକ୍ଷ ଏକର ଜମି ବିଭିନ୍ନ କମ୍ପାନୀଙ୍କୁ ଦେଉଥିବାବେଳେ ଆଦିବାସୀ ଓ ଅଣଆଦିବାସୀ ଲୋକଙ୍କୁ ସେମାନଙ୍କ ନ୍ୟାୟସଙ୍ଗତ ଅଧିକାରରୁ ବଞ୍ଚିତ କରାଯାଉଛି । ଖଣି ଖାଦାନ ପ୍ରକଳ୍ପ ପାଇଁ ହଜାର ହଜାର ଲୋକଙ୍କୁ ସରକାରୀ କ୍ଷତିପୂରଣ ବିନା ନିଜ ଜଙ୍ଗଲ ଓ ଜମିରୁ ବିସ୍ଥାପିତ କରାଯାଉଛି । ଏହା ଫଳରେ ପ୍ରଭାବିତ ଅଞ୍ଚଳର ଲୋକମାନେ ଜୀବିକା ଓ ମୌଳିକ ଅଧିକାର ହରାଇ ଅସୁବିଧାର ସମ୍ମୁଖୀନ ହେଉଛନ୍ତି । ବେଆଇନ ବିସ୍ଥାପନ, ବୃଦ୍ଧି ପାଉଥିବା ବେକାରୀ ସମସ୍ୟା ଏବଂ ନାରୀ ନିର୍ଯାତନା ବିରୋଧରେ ସଂଗ୍ରାମକୁ ଆହୁରି ଶକ୍ତିଶାଳୀ କରିବା ଆବଶ୍ୟକ ବୋଲି ପିସିସି ସଭାପତି ଭକ୍ତ ଦାସ କହିଛନ୍ତି ।
କଂଗ୍ରେସ ଅଭିଯୋଗ କରିଛି ଯେ, ଗ୍ରାମସଭାର ସମ୍ମତି ବିନା ଜମିକୁ କମ୍ପାନୀ ହାତକୁ ଦେବା ପାଇଁ ଚକ୍ରାନ୍ତ କରାଯାଉଛି, ଯାହା ଗଣତନ୍ତ୍ର ବିରୋଧୀ । ଶିଳ୍ପ ସଂସ୍ଥାମାନଙ୍କ ଦ୍ୱାରା ହେଉଥିବା ଅନ୍ୟାୟ, ଅତ୍ୟାଚାର, ଶୋଷଣ ଓ ପ୍ରଦୂଷଣ ବିରୋଧରେ ଏହି ପଦଯାତ୍ରା ମାଧ୍ୟମରେ ସ୍ୱର ଉତ୍ତୋଳନ କରାଯାଉଛି । ଶିଳ୍ପାୟନକୁ ବିରୋଧ କରାଯାଉନାହିଁ, କିନ୍ତୁ ଶିଳ୍ପ ନାଁରେ ସ୍ଥାନୀୟ ବାସିନ୍ଦାଙ୍କୁ ବିସ୍ଥାପିତ କରି ସେମାନଙ୍କ ସହ ଅନ୍ୟାୟ କରାଯିବାକୁ ବିରୋଧ କରାଯାଉଛି । ବିସ୍ଥାପିତ ଓ ପ୍ରଭାବିତ ଲୋକଙ୍କୁ ନ୍ୟାୟ ଦେବା ଉଦ୍ଦେଶ୍ୟରେ ‘ଗାନ୍ଧୀ ପଥେ ନ୍ୟାୟ ପଦଯାତ୍ରା’ ଆରମ୍ଭ ହୋଇଛି । ରାଜ୍ୟର ପ୍ରାୟ ୧୫ଟି ସ୍ଥାନରୁ ବିସ୍ଥାପିତ ଓ ପ୍ରଭାବିତ ଲୋକ ଆନ୍ଦୋଳନରେ ସାମିଲ ହୋଇଛନ୍ତି ।
ମେ ୬ ତାରିଖରେ ଆରମ୍ଭ ହୋଇଥିବା ‘ଗାନ୍ଧୀ ପଥେ ପଦଯାତ୍ରା’ ମେ ୧୪ ତାରିଖରେ ସମାପ୍ତ ହୋଇଥିବା ସମୟରେ ଭକ୍ତ ଦାସଙ୍କ ନେତୃତ୍ୱରେ ରଣହୁଙ୍କାର ଦିଆଯାଇଛି । ଲଢ଼େଇ ଶେଷ ନୁହେଁ, ଆରମ୍ଭ ବୋଲି କହିଛନ୍ତି ଭକ୍ତ ଦାସ । କଂଗ୍ରେସ ନେତୃତ୍ୱ ନିରୀହ ବିସ୍ଥାପିତଙ୍କ ସହ ଯାଇ ରାଜ୍ୟପାଳଙ୍କୁ ଦେଖା କରିବା ସହ ଦାବିପତ୍ର ପ୍ରଦାନ କରିଛନ୍ତି ଓ ସମସ୍ତ ସମସ୍ୟା ସମ୍ପର୍କରେ ପୁଙ୍ଖାନୁପୁଙ୍ଖ ଆଲୋଚନା କରିଛନ୍ତି ।
