ରକ୍ତରଞ୍ଜିତ ଭଞ୍ଜ ମାଟି

ପିନ୍ ବାର୍ତ୍ତା: ଓଡ଼ିଶାରେ ଆଇନଶୃଙ୍ଖଳାକୁ ନେଇ ବିରୋଧୀଙ୍କ ଆକ୍ରମଣ ଦିନକୁ ଦିନ ତୀବ୍ର ହେଉଛି । ହାଜତ ମୃତ୍ୟୁ, ହିଂସା, ପୋଲିସ ବର୍ବରତା ଏବଂ ରାଜନୈତିକ ହିଂସାକୁ ନେଇ ରାଜ୍ୟ ସରକାରଙ୍କୁ ଘେରିବାରେ ଲାଗିଛନ୍ତି କଂଗ୍ରେସ ଓ ବିଜେଡି । ବିଶେଷ କରି ଗଞ୍ଜାମ ଜିଲ୍ଲାର କବିସୂର୍ଯ୍ୟନଗର ହାଜତ ମୃତ୍ୟୁ ଘଟଣା ଏବେ ରାଜ୍ୟ ରାଜନୀତିର କେନ୍ଦ୍ରବିନ୍ଦୁ ପାଲଟିଛି । ବିରୋଧୀଙ୍କ ଅଭିଯୋଗ, ବିଜେପି ସରକାରର ଦୁଇ ବର୍ଷ ଶାସନରେ ଅପରାଧ ବୃଦ୍ଧି ପାଇଛି ଏବଂ ସାଧାରଣ ଲୋକେ ଅସୁରକ୍ଷିତ ମାନେ କରୁଛନ୍ତି ।

କଂଗ୍ରେସ ଅଭିଯୋଗ କରିଛି ଯେ, ରାଜ୍ୟରେ ହାଜତ ମୃତ୍ୟୁ ଓ ହିଂସା ଚିନ୍ତାଜନକ ଭାବେ ବଢ଼ିଛି । କବିସୂର୍ଯ୍ୟନଗର, ବାରଙ୍ଗ ଓ ବାଲିଅନ୍ତା ଭଳି ଘଟଣା ଯୋଗୁଁ ରାଜ୍ୟର ଆଇନଶୃଙ୍ଖଳା ବ୍ୟବସ୍ଥା ଭୁଶୁଡି ଯାଇଛି । ପୋଲିସ ଅପରାଧ ନିୟନ୍ତ୍ରଣ କରିବା ପରିବର୍ତ୍ତେ ନିରୀହ ଲୋକଙ୍କ ଉପରେ ଥାର୍ଡ ଡିଗ୍ରି ପ୍ରୟୋଗ କରୁଥିବା ଅଭିଯୋଗ ହୋଇଛି । ଏହି ପ୍ରସଙ୍ଗକୁ ନେଇ ଓଡ଼ିଶା ଜନତା କଂଗ୍ରେସ ଡିଜି ଅଫିସ ଘେରାଉ କରିବା ସହ ଦଳ ପକ୍ଷରୁ କବିସୂର୍ଯ୍ୟନଗର ଘଟଣାର ବିଚାର ବିଭାଗୀୟ ତଦନ୍ତ ଏବଂ ମୃତକଙ୍କ ପରିବାରକୁ ୨ କୋଟି ଟଙ୍କା କ୍ଷତିପୂରଣ ଦେବାକୁ ଦାବି କରାଯାଇଛି ।

ଗଞ୍ଜାମ ଜିଲ୍ଲା ସୁବୁଳିଆ ଗାଁର ୩୨ ବର୍ଷୀୟ ସୁଶାନ୍ତ ସାହୁ ଶାରୀରିକ ଭାବେ ଦିବ୍ୟାଙ୍ଗ । ସେ ଦିନ ମଜୁରିଆ ଭାବେ କାମ କରୁଥିବା ବେଳେ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ । ଗତ ମେ ୨୫ ତାରିଖରେ ଏକ ପଥର ଫଟା ଘଟଣାରେ ସଂପୃକ୍ତ ଥିବା ସନ୍ଦେହରେ ପୋଲିସ ତାଙ୍କୁ ନିଜ ହେପାଜତକୁ ନେଇଥିଲା । ତେବେ ପରିବାର ଲୋକଙ୍କ ଅଭିଯୋଗ ଅନୁସାରେ, ତାଙ୍କୁ ଥାନା ଭିତରେ ଦୀର୍ଘ ସମୟ ଧରି ଅଟକ ରଖାଯିବା ସହ ଅମାନୁଷିକ ନିର୍ଯାତନା ଦିଆଯାଇଥିଲା । ସୁଶାନ୍ତଙ୍କ ପତ୍ନୀ ଅଭିଯୋଗ କରିଛନ୍ତି ଯେ, ପୋଲିସ ତାଙ୍କ ସ୍ୱାମୀଙ୍କ ଉପରେ ଗରମ ପାଣି ଢାଳିଥିଲା ଏବଂ ନିସ୍ତୁକ ମାଡ଼ ମାରିଥିଲା । ଏହି ନିର୍ଯାତନା ଫଳରେ ତାଙ୍କ ଶରୀରରେ ଫୋଟକା ବାହାରି ଯାଇଥିଲା । ପରେ ବ୍ରହ୍ମପୁର ବଡ଼ ଡାକ୍ତରଖାନାରେ ତାଙ୍କର ମୃତ୍ୟୁ ଘଟିଥିଲା ।

ଏହି ଘଟଣା ପରେ ରାଜ୍ୟ ପୋଲିସ ବିଭାଗ ମାମଲାକୁ ଗୁରୁତର ସହ ନେଇଛି। ପୋଲିସ ମହାନିର୍ଦ୍ଦେଶକ ଯୋଗେଶ ବାହାଦୂର ଖୁରାନିଆ ଏହାର ତଦନ୍ତ ଭାର ହ୍ୟୁମାନ ରାଇଟ୍ସ ପ୍ରୋଟେକ୍ସନ ସେଲ୍‌ (ଏଚଆରପିସି)କୁ ଦେଇଛନ୍ତି । ଘଟଣାର ନିରପେକ୍ଷ ତଦନ୍ତ ଓ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ସାଧାରଣରେ ଦାବି ଜୋର ଧରିଛି । କେବଳ ହାଜତ ମୃତ୍ୟୁ ନୁହେଁ, ଗଞ୍ଜାମରେ ରାଜନୈତିକ ହିଂସା ମଧ୍ୟ ଚିନ୍ତା ବଢ଼ାଇଛି । ପଞ୍ଚାୟତ ନିର୍ବାଚନକୁ ଆହୁରି ସମୟ ବାକି ଥିବାବେଳେ ରାଜନୈତିକ ଦ୍ୱନ୍ଦ୍ୱ ହିଂସାର ରୂପ ନେବା ଆରମ୍ଭ କରିଛି । ପୁରୁଷୋତ୍ତମପୁର ଥାନା ଅନ୍ତର୍ଗତ କୁଶପୁର ଗାଁରେ ବାଘଳା ସମିତିସଭ୍ୟ ପ୍ରକାଶ ନାହାକଙ୍କ ଉପରେ ସଶସ୍ତ୍ର ଆକ୍ରମଣ ଏହାର ଏକ ଉଦାହରଣ । ଅଭିଯୋଗ ଅନୁସାରେ, ଏକ ଗୋଷ୍ଠୀ ତାଙ୍କ ଘରେ ପଶି ଖଣ୍ଡା, କାତି ଓ ବର୍ଚ୍ଛାରେ ପ୍ରାଣାନ୍ତକ ଆକ୍ରମଣ କରିଥିଲେ ।

ରାଜ୍ୟରେ ଆଇନଶୃଙ୍ଖଳା ବ୍ୟବସ୍ଥା ଭୁଶୁଡ଼ି ପଡ଼ିଛି ଏବଂ ଅପରାଧୀମାନଙ୍କ ମନରୁ ପୋଲିସ ଭୟ ଉଠିଯାଇଛି । ଅନ୍ୟପକ୍ଷରେ ସରକାର ତଦନ୍ତ ଚାଲିଥିବା ଓ ଆବଶ୍ୟକ ପଦକ୍ଷେପ ନିଆଯାଉଥିବା କହୁଛନ୍ତି । ତେବେ କବିସୂର୍ଯ୍ୟନଗର ହାଜତ ମୃତ୍ୟୁ ଏବଂ ଗଞ୍ଜାମରେ ବଢୁଥିବା ହିଂସା ଘଟଣା ରାଜ୍ୟର ଆଇନଶୃଙ୍ଖଳା ପରିସ୍ଥିତି ଚର୍ଚ୍ଚାର ବିଷୟ ହୋଇଛି । ଭଞ୍ଜ ମାଟିରେ ଏଭଳି ପରିସ୍ଥିତି କେବଳ ଜିଲ୍ଲାର ନୁହେଁ, ବରଂ ସମଗ୍ର ରାଜ୍ୟର ଶାସନ ବ୍ୟବସ୍ଥା ଓ ଆଇନଶୃଙ୍ଖଳା ଉପରେ ପ୍ରଶ୍ନ ଉଠାଉଛି ।