Kirti Kiran Mahapatra
ପିନ୍ ବାର୍ତ୍ତା: ଭୁବନେଶ୍ୱରର ସବୁଠାରୁ ବ୍ୟସ୍ତବହୁଳ ଜୟଦେବ ବିହାର-ନନ୍ଦନକାନନ କରିଡରରେ ଟ୍ରାଫିକ୍ ଜାମ୍ ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟ ସରକାର ଏକ ବହୁପ୍ରତୀକ୍ଷିତ ରାସ୍ତା ଭିତ୍ତିଭୂମି ପ୍ରକଳ୍ପ ହାତକୁ ନେଇଛନ୍ତି। କମିଶନରେଟ୍ ପୋଲିସର ସୂଚନା ଅନୁଯାୟୀ, ଆଗାମୀ ୪୫ ଦିନ ଅର୍ଥାତ୍ ଅଗଷ୍ଟ ୬ ରୁ ସେପ୍ଟେମ୍ବର ୧୯ ପର୍ଯ୍ୟନ୍ତ ଏହି ମାର୍ଗରେ ପ୍ରସ୍ତାବିତ ଫ୍ଲାଏଓଭର ପ୍ରକଳ୍ପ ପାଇଁ ପ୍ରାରମ୍ଭିକ ମାଟି ପରୀକ୍ଷା ବା ଜିଓଟେକ୍ନିକାଲ୍ ସର୍ବେକ୍ଷଣ କାର୍ଯ୍ୟ ଆରମ୍ଭ ହେବାକୁ ଯାଉଛି। ଏହି କାରଣରୁ କଳିଙ୍ଗ ଷ୍ଟାଡିୟମ୍ ଗେଟ୍ ନଂ ୭ ଓ ୮, ପାଲ୍ ହାଇଟ୍ସ (ଜୟଦେବ ବିହାର), କଳିଙ୍ଗ ହସ୍ପିଟାଲ୍ ଛକ, ଡମଣା ଛକ ଏବଂ କିଟ୍ ଛକ ଭଳି ୫ଟି ପ୍ରମୁଖ ସ୍ଥାନରେ ରାସ୍ତା ଆଂଶିକ ଅବରୁଦ୍ଧ ରହିବ, ଯାହାକି ପ୍ରାଇମ ଟାଇମ୍ ରେ ଯାନବହନ ଚଳାଚଳକୁ ପ୍ରଭାବିତ କରିବ। ଯାତ୍ରୀମାନଙ୍କୁ ବିଶେଷକରି ବେହେରା ସାହି ଛକ ଏବଂ କିଟ୍ ଛକ ମଧ୍ୟରେ ଯାତ୍ରା କରିବାକୁ ଥିଲେ ବିକଳ୍ପ ମାର୍ଗ ବ୍ୟବହାର କରିବାକୁ ଏବଂ ପୋଲିସର ନିର୍ଦ୍ଦେଶକୁ ମାନିବାକୁ ପରାମର୍ଶ ଦିଆଯାଇଛି।
ଏହି ନିଷ୍ପତି ପଛରେ ଏକ ପ୍ରମୁଖ କାରଣ ରହିଛି। ଏହି ଫ୍ଲାଏଓଭର ପ୍ରକଳ୍ପର ମୂଳଦୁଆ ଏବଂ ଡିଜାଇନ୍ ର ସ୍ଥିତି ନିର୍ଧାରଣ ପାଇଁ ମାଟି ପରୀକ୍ଷା ଅତ୍ୟନ୍ତ ଜରୁରୀ । ତେବେ ଏଠି କହି ରଖୁଛୁ ଯେ, ଭୁବନେଶ୍ୱରର ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦର (BPIA) ଏବଂ କଟକ ତ୍ରିଶୂଳିଆ ମଧ୍ୟରେ ୨୬ କିଲୋମିଟର ଦୀର୍ଘ ମେଟ୍ରୋ ରେଳ ପ୍ରକଳ୍ପ ପାଇଁ ମଧ୍ୟ ଦିଲ୍ଲୀ ମେଟ୍ରୋ ରେଳ କର୍ପୋରେସନ୍ (DMRC) ପକ୍ଷରୁ ୨୦୨୩ ମସିହା ରେ ସମାନ ଭାବରେ ମାଟି ପରୀକ୍ଷା କରାଯାଇଥିଲା। ସେହି ସମୟରେ ନନ୍ଦନକାନନ ଏବଂ ତ୍ରିଶୂଳିଆ ମଧ୍ୟରେ ବିଭିନ୍ନ ସ୍ଥାନରେ ପ୍ରତି ଏକ କିଲୋମିଟର ବ୍ୟବଧାନରେ ଏବଂ ପ୍ରତି ୧.୫ ମିଟରରେ ମାଟିର ନମୂନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା, ଯାହାକି ମେଟ୍ରୋ ପିଲର ନିର୍ମାଣର ଭାରବହନ କ୍ଷମତାକୁ ଆକଳନ କରିବାରେ ସାହାଯ୍ୟ କରିଥିଲା।
ଏହି ସମସ୍ତ ସର୍ବେକ୍ଷଣ ରିପୋର୍ଟ ଆଧାରରେ ପ୍ରକଳ୍ପଗୁଡ଼ିକର ବିସ୍ତୃତ ରିପୋର୍ଟ ପ୍ରସ୍ତୁତ କରାଯାଇଥାଏ। ଏହିପରି ବୃହତ୍ ଭିତ୍ତିଭୂମି ପ୍ରକଳ୍ପଗୁଡ଼ିକର ପ୍ରାରମ୍ଭିକ ପର୍ଯ୍ୟାୟରେ ଯାତାୟାତରେ କିଛି ଅସ୍ଥାୟୀ ଅସୁବିଧା ଓ ବିରକ୍ତିକର ପରିସ୍ଥିତି ସୃଷ୍ଟି ହେଉଥିଲେ ମଧ୍ୟ, ଦୀର୍ଘକାଳୀନ ଭାବରେ ଏହା ସହରର ପରିବହନ ବ୍ୟବସ୍ଥାକୁ ସମ୍ପୂର୍ଣ୍ଣ ବଦଳାଇବାରେ ସାହାଯ୍ୟ କରିବ ଏବଂ ପ୍ରମୁଖ କରିଡରରେ ଟ୍ରାଫିକ୍ ଭିଡ଼କୁ ହ୍ରାସ କରିବ। ତେବେ ଏହି ନୂତନ ଫ୍ଲାଏଓଭର ନିର୍ମାଣ ଦ୍ୱାରା ଲୋକମାନେ ଭବିଷ୍ୟତରେ ସୁଗମ ଓ ଦ୍ରୁତ ଯାତ୍ରାର ସୁବିଧା ପାଇପାରିବେ। ତେଣୁ ସହରର ଉନ୍ନତି ଏବଂ ସୁଗମ ପରିବହନ ପାଇଁ ଜନସାଧାରଣଙ୍କ ସହଯୋଗ, ଧୈର୍ଯ୍ୟ ଏବଂ ଟ୍ରାଫିକ୍ ନିୟମ ପାଳନ କରିବା ଅତି ଜରୁରୀ ଅଟେ।
