ଉତ୍ସୃଙ୍ଖଳ ଡ୍ରାଇଭରଙ୍କ ଉପରେ କଠୋର ହେଲେ ସରକାର

ପିନ୍ ବାର୍ତ୍ତା: ଚତୁର୍ଥ ଦିନରେ ପହଁଚିଛି ଅନଲାଇନ କ୍ୟାବ ସର୍ଭିସ ସଂଘର ଆନ୍ଦୋଳନ । ଓଲା, ଉବେର ଓ ରାପିଡୋ ଚାଳକ ସଂଘ ଲୋୟର ପିଏମଜିରେ ବଡ଼ ଧରଣର ଆନ୍ଦୋଳନ କରୁଛି । ଅନଲାଇନ ଗାଡ଼ି ଡ୍ରାଇଭରଙ୍କ ଆନ୍ଦୋଳନ ପାଇଁ ରାଜଧାନୀରେ ପ୍ରଭାବିତ ହୋଇଛି ଜନଜୀବନ । ଭଡ଼ା ବୃଦ୍ଧି, କମ ଆପ୍ ଫି’, ସାମାଜିକ ସୁରକ୍ଷା ଏବଂ ଅନ୍ୟାନ୍ୟ ଦାବିକୁ ନେଇ ଅଗଷ୍ଟ 17 ତାରିଖରୁ ଏହି ଡ୍ରାଇଭରମାନେ କାର୍ଯ୍ୟବନ୍ଦ ଆନ୍ଦୋଳନ ଜାରି ରଖିଛନ୍ତି । ମାତ୍ର ତୃତୀୟ ଦିନରେ ଏହି ଆନ୍ଦୋଳନ ଉଗ୍ର ରୂପ ଧାରଣ କରି ରାଜଧାନୀର ମାଷ୍ଟର କ୍ୟାଣ୍ଟିନ, ରେଳଷ୍ଟେସନ ଏବଂ ଲୋଅର ପିଏମଜି ଅଞ୍ଚଳରେ ବ୍ୟାପକ ଅଶାନ୍ତି ସୃଷ୍ଟି କରିଥିଲା । ଯାହା ଫଳ ରେ ସରକାର ଙ୍କୁ କଠୋର ନୀତି ଆପଣେଇବାକୁ ପଡ଼ିଛି ।

ଆନ୍ଦୋଳନରତ ଡ୍ରାଇଭରମାନେ ରାଜମହଲ ଛକ ଓ ଷ୍ଟେସନ ଛକ ପର୍ଯ୍ୟନ୍ତ ରାସ୍ତାରେ ଗାଡ଼ି ରଖି ବାଧାସୃଷ୍ଟି କରିବା ସହିତ ଟ୍ରାଫିକ୍ ବ୍ୟବସ୍ଥାକୁ ଠପ୍ କରିଦେଇଥିଲେ । ପୋଲିସ ରାସ୍ତା ଖାଲି କରିବାକୁ ଅନୁରୋଧ କରିବାରୁ ଉତ୍ତ୍ୟକ୍ତ ଡ୍ରାଇଭରମାନେ ପୋଲିସ ଉପରକୁ ପଥର ମାଡ଼ କରିଥିଲେ । ଏହି ହିଂସାକାଣ୍ଡରେ ରାଜଧାନୀ ପୋଲିସ ଷ୍ଟେସନର ଆଇଆଇସି ରାଧାକାନ୍ତ ସାହୁ ଏବଂ ଅନ୍ୟ ୧୩ ଜଣ ପୋଲିସ କର୍ମଚାରୀଙ୍କ ସମେତ ମୋଟ ୨୫ ରୁ ଅଧିକ ଜଣ ଆହତ ହୋଇଛନ୍ତି । ସମସ୍ତ ଆହତ ପୋଲିସ କର୍ମଚାରୀଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି ।

କେବଳ ପୋଲିସ ନୁହେଁ, ଆନ୍ଦୋଳନକାରୀଙ୍କ ଉତ୍ପାତରେ ରାସ୍ତାରେ ଠପ୍ ହୋଇ ରହିଥିବା ପ୍ରାୟ ୧୫ ଟି ‘ଆମ ବସ୍’ (Ama Buses) ଏବଂ ୧୦ ରୁ ଅଧିକ ବେସରକାରୀ କାର୍ ଓ ପୋଲିସ ଭ୍ୟାନ୍ ଭଙ୍ଗାରୁଜା ହୋଇଥିଲା । ବସ୍ ଗୁଡ଼ିକର କାଚ ଭଙ୍ଗାଯିବା ସହ ଟାୟାରରୁ ପବନ ମଧ୍ୟ ବାହାର କରିଦିଆଯାଇଥିଲା । ଯାହାଫଳରେ ସାଧାରଣ ଯାତ୍ରୀମାନେ ଭୟଭୀତ ହୋଇ ଦୌଡ଼ାଦୌଡ଼ି କରିଥିଲେ ଏବଂ ଦୈନନ୍ଦିନ ଯାତାୟାତ ପାଇଁ ବସ୍ ଉପରେ ନିର୍ଭର କରୁଥିବା ଲୋକେ ନାନା ଅସୁବିଧାର ସମ୍ମୁଖୀନ ହୋଇଥିଲେ ।

ପରିସ୍ଥିତି ନିୟନ୍ତ୍ରଣ ବାହାରକୁ ଯିବାରୁ ପୋଲିସ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ପୋଲିସ ପକ୍ଷରୁ ଲାଠିଚାର୍ଜ ଏବଂ ୱାଟର କାନନ୍ (water cannons) ବ୍ୟବହାର କରାଯାଇ ଭିଡ଼କୁ ନିୟନ୍ତ୍ରଣ କରିବାକୁ ଚେଷ୍ଟା କରାଯାଇଥିଲା। ଭୁବନେଶ୍ୱର ଡିସିପି ଜଗମୋହନ ମୀନା କହିଛନ୍ତି ଯେ କେବଳ ଅଗଷ୍ଟ ୧୭ ତାରିଖ ପାଇଁ ମହାତ୍ମା ଗାନ୍ଧୀ ମାର୍ଗରେ ଆନ୍ଦୋଳନ କରିବାକୁ ଅନୁମତି ଦିଆଯାଇଥିଲା, କିନ୍ତୁ ଆନ୍ଦୋଳନକାରୀମାନେ ବେଆଇନ ଭାବେ ବିନା ଅନୁମତିରେ ଦୁଇ ଦିନ ଅଧିକ ସମୟ ଧରି ରାସ୍ତାରେ ବସି ରହିଥିଲେ । ଏପରିକି ଆନ୍ଦୋଳନ ପାଇଁ ଅଟୋଗୁଡ଼ିକରେ ପୂର୍ବରୁ ପଥର ଲୋଡ୍ କରାଯାଇଥିବା ଦେଖିବାକୁ ମିଳିଥିଲା ।

ଏହି ଘଟଣାରେ ଖାରବେଳ ନଗର ପୋଲିସ ଷ୍ଟେସନରେ ୭ ଟି ଏଫ୍.ଆଇ.ଆର୍. (FIR) ରୁଜୁ ହୋଇଛି । ପୋଲିସ ଏପର୍ଯ୍ୟନ୍ତ ୧୧୩ ଜଣଙ୍କୁ ଗିରଫ କରିଥିବା ବେଳେ ଭଲ ଆଚରଣ ପାଇଁ ୬୦ ଜଣଙ୍କୁ ଛାଡ଼ି ଦିଆଯାଇଛି । ଏହାସହିତ ହିଂସାରେ ସଂପୃକ୍ତ  ୪୦୦ ଟି ଯାନବାହାନକୁ ଜବତ କରାଯାଇଛି । ଓଡ଼ିଶା ପରିବହନ ବିଭାଗ ପକ୍ଷରୁ ଏହି ଗାଡ଼ିଗୁଡ଼ିକର ପରମିଟ୍, ରେଜିଷ୍ଟ୍ରେସନ ସାର୍ଟିଫିକେଟ୍ (RC) ଏବଂ ଡ୍ରାଇଭିଂ ଲାଇସେନ୍ସ ବାତିଲ୍ କରିବା ପାଇଁ ପ୍ରକ୍ରିୟା ଆରମ୍ଭ ହୋଇଛି ।

ବାଣିଜ୍ୟ ଏବଂ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ସ୍ପଷ୍ଟ କରିଛନ୍ତି ଯେ କେହି ମଧ୍ୟ ଆଇନକୁ ନିଜ ହାତକୁ ନେବାକୁ ଦିଆଯିବ ନାହିଁ । ତେବେ ଡ୍ରାଇଭରମାନଙ୍କର ଯଥାର୍ଥ ଅଭିଯୋଗକୁ ସମାଧାନ କରିବା ପାଇଁ ସରକାର ପ୍ରସ୍ତୁତ ଅଛନ୍ତି । ଅନ୍ୟପକ୍ଷରେ, ଅନଲାଇନ୍ ଡ୍ରାଇଭରମାନଙ୍କର ଏପରି ମନଇଚ୍ଛା ଭଡ଼ା ମାଗିବା, ଗ୍ରାହକଙ୍କୁ ନିଜ ଆଡ଼ୁ କ୍ୟାନ୍ସେଲ୍ କରିବାକୁ ବାଧ୍ୟ କରିବା ଏବଂ ହିଂସାତ୍ମକ ଆଚରଣ ଯୋଗୁଁ ସାଧାରଣ ଜନତାଙ୍କ ମଧ୍ୟରେ ସେମାନଙ୍କ ପ୍ରତି ଅସନ୍ତୋଷ ବୃଦ୍ଧି ପାଇଛି । ଆନ୍ଦୋଳନ ନାମରେ ଅରାଜକତା ସୃଷ୍ଟି କରୁଥିବା ଏହି ଉତ୍ସୃଙ୍ଖଳ ଡ୍ରାଇଭରଙ୍କ ବିରୋଧରେ ପ୍ରଶାସନର କଠୋର କାର୍ଯ୍ୟାନୁଷ୍ଠାନ ଜାରି ରହିଛି ।