ଏନକାଉଣ୍ଟର ଆହୁରି ଦରକାର

ବର୍ତ୍ତମାନ ଓଡ଼ିଶାରେ ଆଇନ ଶୃଙ୍ଖଳା ପରିସ୍ଥିତି ଏବଂ ଅପରାଧ ନିୟନ୍ତ୍ରଣକୁ ନେଇ ଚର୍ଚ୍ଚା ଜୋର ଧରିଛି । ବିଶେଷ କରି ରାଜ୍ୟରେ ପୋଲିସ ଏନକାଉଣ୍ଟର (Encounter) ମାମଲା ଦେଖିବାକୁ ମିଳୁଛି । ନିକଟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟରେ ଘଟୁଥିବା ଅପରାଧକୁ ସମ୍ପୂର୍ଣ୍ଣ ରୂପେ ଦମନ କରିବା ପାଇଁ ଏବଂ ଅପରାଧୀଙ୍କ ମନରେ ଆଇନର ଭୟ ସୃଷ୍ଟି କରିବା ପାଇଁ ପୋଲିସ ପ୍ରଶାସନକୁ କଡ଼ା ନିର୍ଦ୍ଦେଶ ଦେଇଛନ୍ତି । ସରକାରଙ୍କ ପକ୍ଷରୁ ଅପରାଧୀଙ୍କ ବିରୋଧରେ ‘ଜିରୋ ଟଲରାନ୍ସ’ ନୀତି ଆପଣେଇବା ସହ କୁଖ୍ୟାତ ଅପରାଧୀଙ୍କୁ କାବୁ କରିବା ପାଇଁ ଗ୍ରୀନ ସିଗନାଲ ଦିଆଯାଇଛି । ଏହି କ୍ରମରେ ଓଡ଼ିଶା ପୋଲିସ ଦ୍ୱାରା ଅପରାଧୀଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।

ରାଜ୍ୟର ବିଭିନ୍ନ ସ୍ଥାନରେ ଗତ କିଛି ଦିନ ହେବ ଏକାଧିକ ଏନକାଉଣ୍ଟର ଘଟଣା ସାମ୍ନାକୁ ଆସିଛି । ଝାରସୁଗୁଡ଼ା , ସମ୍ବଲପୁର ଏବଂ ଗଞ୍ଜାମ ଜିଲ୍ଲାରେ ପୋଲିସ ଓ ଅପରାଧୀଙ୍କ ମଧ୍ୟରେ ଗୁଳିବିନିମୟ ହୋଇଛି । ବିଶେଷ କରି ଗଞ୍ଜାମ ଜିଲ୍ଲାର ବ୍ରହ୍ମପୁର ଅଞ୍ଚଳରେ ଏହି ପ୍ରକ୍ରିୟା ଅଧିକ ସକ୍ରିୟ ଥିବା ଜଣାପଡ଼ିଛି । ବ୍ରହ୍ମପୁର ଲାଞ୍ଜିପଲ୍ଲୀ ଅଞ୍ଚଳ ରେ ୧୨ରୁ ଅଧିକ ମାମଲାରେ ସଂପୃକ୍ତ ଥିବା ଜଣେ ଦୁର୍ଦ୍ଦାନ୍ତ ଅପରାଧୀ ଦୀପୁନା ନାୟକକୁ ପୋଲିସ ଏନକାଉଣ୍ଟର କରି ଗିରଫ କରିଛି । ସେହିପରି ନିକଟରେ ଚର୍ଚ୍ଚିତ ଜମି ବ୍ୟବସାୟୀ ସୁଧୀର ପାତ୍ର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ରଞ୍ଜନ ମଲ୍ଲିକ ଏବଂ ସରୋଜ ପଣ୍ଡା ଓରଫ ଭିକିକୁ ରତ୍ନପୁର ନିକଟରେ ଏନକାଉଣ୍ଟର କରାଯାଇଛି । ଏହା ସହିତ ଗିରିରୋଡ ମାଡ଼ ମାମଲାର ମୁଖ୍ୟ ଅଭିଯୁକ୍ତ ମୁକେଶ ସାହୁକୁ ମଧ୍ୟ୍ୟ ପୋଲିସ ଗୁଳି ଚଳାଇ କାବୁ କରିଛି ।

କେବଳ ଗଞ୍ଜାମ ନୁହଁ, ଭୁବନେଶ୍ୱର ରେ ମଧ୍ୟ ଅପରାଧୀ ଙ୍କୁ ମୂଳପୋଛ କରିବା ପାଇଁ ଏନକାଉଣ୍ଟର କରାଯାଉଛି । ନିକଟ ରେ ଇନଫୋଭ୍ୟାଲି ଥାନା ଅଞ୍ଚଳରେ କମିଶନରେଟ ପୋଲିସ ଗଞ୍ଜାମ ଜଗନ୍ନାଥପ୍ରସାଦର କୁଖ୍ୟାତ ଡ୍ରଗ୍ସ ମାଫିଆ ପପୁନ ମାଝୀକୁ ଏନକାଉଣ୍ଟର କରିଛି । ପୋଲିସ ଉପରକୁ ଗୁଳି ଚଳାଇ ଖସିଯିବାକୁ ଚେଷ୍ଟା କରୁଥିବାବେଳେ ଜବାବୀ ହମଲାରେ ସେ ଆହତ ହୋଇଛି ।ପପୁନ ମାଝୀ ଓରଫ ପପୁନ କେବଳ ଜଣେ ସାଧାରଣ ଅପରାଧୀ ନୁହେଁ , ବରଂ ସେ ଓଡ଼ିଶାର ଏକ ବଡ଼ ନାର୍କୋଟିକ୍ସ ବା ମାଦକ ଦ୍ରବ୍ୟ ଚୋରା ଚାଲାଣ ନେଟୱର୍କର ଏକ ପ୍ରମୁଖ ଅଂଶ ଥିଲା । ଏହି କୁଖ୍ୟାତ ଡ୍ରଗ୍ସ ମାଫିଆ ଦୀର୍ଘ ଦିନ ଧରି ପୋଲିସ ଆଖିରେ ଧୂଳି ଦେଇ ରାଜ୍ୟର ବିଭିନ୍ନ ସ୍ଥାନରେ ବେଆଇନ ନିଶା କାରବାର ଚଳାଇ ଆସୁଥିଲା ।

ଅତୀତର ରାଜନୈତିକ ସ୍ଥିତିକୁ ଦେଖିଲେ , ଯେତେବେଳେ ରାଜ୍ୟରେ ବିଜେଡି (BJD) ସରକାର କ୍ଷମତାରେ ଥିଲା , ସେତେବେଳେ ଏନକାଉଣ୍ଟର ଭଳି ଘଟଣା ଏତେ ମାତ୍ରାରେ ଦେଖାଯାଉନଥିଲା । କିନ୍ତୁ ବର୍ତ୍ତମାନ ସମୟରେ ରାଜ୍ୟରେ ଅପରାଧ ହାର ଏବଂ ହିଂସାତ୍ମକ ଘଟଣା ବୃଦ୍ଧି ପାଇଛି , ଯାହା ସାଧାରଣ ଜନତାଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି । ବିରୋଧୀ ଦଳ ମଧ୍ୟ ଏହି ବିଗିଡ଼ିଥିବା ଆଇନ ଶୃଙ୍ଖଳା ଏବଂ ଖୋଲାଖୋଲି ଭାବେ ଚାଲିଥିବା ଅପରାଧକୁ ନେଇ ସରକାରଙ୍କକୁ ଘେରିଛନ୍ତି ।

ତେବେ କେବଳ ଏନକାଉଣ୍ଟର କରିବା ଦ୍ୱାରା ଅପରାଧ ସମ୍ପୂର୍ଣ୍ଣ ଶେଷ ହୋଇଯିବ ନାହିଁ । ଏନକାଉଣ୍ଟର କଦାପି ଏକମାତ୍ର କିମ୍ବା ସ୍ଥାୟୀ ସମାଧାନ ହୋଇପାରିବ ନାହିଁ । ଅପରାଧକୁ ସମୂଳେ ନାଶ କରିବା ପାଇଁ ହେଲେ ଅପରାଧୀଙ୍କ ଆର୍ଥିକ ସାମ୍ରାଜ୍ୟ , ସେମାନଙ୍କର ନେଟୱର୍କ ଏବଂ ଅପରାଧର ମୂଳ ଉତ୍ସକୁ ଭାଙ୍ଗିବାକୁ ପଡ଼ିବ । ଅପରାଧୀ ଜନ୍ମ ହେବାର କାରଣକୁ ବୁଝି ତାହାକୁ ଚେରରୁ ଓପାଡ଼ିବା ଆବଶ୍ୟକ । ଆଇନଗତ ପ୍ରକ୍ରିୟାକୁ ଅଧିକ ଦୃଢ଼ କରିବା ସହ ନିୟମିତ ପାଟ୍ରୋଲିଂ ଏବଂ ପ୍ରତିଷେଧକ ମୂଳକ ଗିରଫଦାରୀ ଦ୍ୱାରା ହିଁ ଓଡ଼ିଶାରେ ଏକ ଶାନ୍ତିପୂର୍ଣ୍ଣ ପରିବେଶ ଫେରିଆସିପାରିବ ।