ତଥାପି ଧର୍ମେନ୍ଦ୍ରଙ୍କ ଇସ୍ତଫା ଦରକାର !

ସୁଦାମ ଶେଖର: କିଛିଦିନ ନିରବ ରହିବା ପରେ ପୁଣି ଚର୍ଚ୍ଚା ଧରିଛି, ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା । ପରିବେଶବିତ ସୋନମ ବାଙ୍ଗଚୁକଙ୍କ ଅନଶନ ଢେର ଦିନରୁ ଚାଲିଛି । ଅନଶନ ଠାରୁ ପ୍ରମୁଖ ବିରୋଧୀ ଦଳ କଂଗ୍ରେସ ନିଜକୁ ବାହାରୁ ଦୁରେଇ ରଖିଥିଲେ ମଧ୍ୟ ଆନ୍ତରିକ ସମର୍ଥନ ରଖିବା ଖବର ଆସୁଛି । କିଛି ଛୋଟ ଛୋଟ ଦଳ ସମର୍ଥନ ଦେବା ଆରମ୍ଭ କରିଛନ୍ତି । ଆମ ପ୍ରଶ୍ନ ହେଲା, ଧର୍ମେନ୍ଦ୍ର ବାବୁ ଇସ୍ତଫା ଦେଇଦେଲେ ସମସ୍ୟା, ମାନେ ପେପର ଲିକ, ସମାଧାନ ହେଇଯିବ କି ? ନା, ବିଲକୁଲ ନୁହଁ। ତେବେ ଅନଶନ କାହିଁକି ?

ସୋମବାର ଠାରୁ ଲୋକସଭା ଅଧିବେଶନ ଆରମ୍ଭ ହେବାକୁ ଯାଉଛି । ସେଠାରେ ଆଲୋଚନା ଜୋରଦାର ହେବା ଉଚିତ । ପରୀକ୍ଷା ପେପର ପୋଡ଼ି ଯୁଗ ଯାଇ ପେପର ଲିକ ଯୁଗ ଆରମ୍ଭ ହେଇଛି । ଯାହା ଗରିବ ପିଲାଙ୍କ ଯେଉଁ ସ୍ୱପ୍ନ ଅଛି, ତାକୁ ଚୁରମାର କରିଦେଉଛି । ଧନୀ ଘରର ପିଲା ଙ୍କ ସ୍ୱପ୍ନ କେବେ ଚୁରମାର ହେବା ଦେଖା ଯାଏ ନାହିଁ । ସେମାନେ ପୈସାବାଲା। ସରକାର ପୁଣି ୟୁଜି ନିଟ ପରୀକ୍ଷା କରି ଏବେ ଫଳାଫଳ ବି ବାହାରି ସାରିଲାଣି । ତଥାପି ଧର୍ମେନ୍ଦ୍ର ବାବୁ ଇସ୍ତଫା ଦିଅନ୍ତୁ ବୋଲି ବିରୋଧୀ ଦଳ ଚାହାନ୍ତି । ମୋଦିଙ୍କ ଇସ୍ତଫା ସେମାନେ ଚାହୁଁ ନାହାନ୍ତି । ଭାବିଲେ, ଅଡ଼ୁଆ ଲାଗୁଛି ।

ସଂସଦ ଭାରତକୁ ପରିଚାଳନା କରିବା ଏକ ନୀତି ନିୟାମକ ସଦନ । ନୀତି ନିର୍ଦ୍ଧାରଣ କରିବା ପରେ, କାର୍ଯ୍ୟକାରୀ କରିବେ ପ୍ରଶାସନ । ଏବେ ଏ ମାମଲାରେ ସରକାର କଠୋର ହୋଇ କାର୍ଯ୍ୟାନୁଷ୍ଠାନ ନେବା ଖବର ସମସ୍ତେ ଉଣା ଅଧିକେ ଜାଣିଛନ୍ତି । ତା’ ସହିତ କିଛି ନୀତି ପରିବର୍ତ୍ତନ ବି କଲେଣି ସରକାର । ତେବେ ବିରୋଧ ସରକାରକୁ ନା ପ୍ରଶାସନକୁ ? ଭୁତ କାଚରେ ଏମିତି ବହୁତ ବଡ଼ ଭୁତ ଦେଖାଯାଉଛି ଯେ। ବିରୋଧୀ ଦଳ ଓ ନେତା ସେମାନଙ୍କ ଅସ୍ତିତ୍ବ ଜାହିର କରିବା ପାଇଁ ନୁହେଁ କି ? ଯଦି ୟୁଜି ନିଟ ହାଟ ଚାଲିବ, ସରକାର ବି ଫାଇଦା ଉଠେଇବା ଅସମ୍ଭବ ନୁହେଁ । ମାରିନେବେ ମହାପାତ୍ରେ, ଚାହିଁଥିବେ ଜଳକା, ପରି ହେଇ ଯିବନି ତ ?

ଧର୍ମେନ୍ଦ୍ର ବାବୁଙ୍କ ଦେଶ ପ୍ରତି ସେବା ମନୋଭାବକୁ କେହି ବି ତାରିଫ ନ କରି ରହି ପାରିବେ ନାହିଁ । ତାଙ୍କୁ ଅଧିକ ଦାୟିତ୍ୱ ଦିନକୁ ଦିନ ମିଳିବାରେ ଲାଗିଛି , କମିବ ନାଁ ନେଉ ନାହିଁ। ସେ ନିଜେ ନିଜ କାମକୁ ନେଇ ପୂର୍ଣ୍ଣ ଆତ୍ମବିଶ୍ବାସ ଥିବା ପରି ମନେ ହୁଅନ୍ତି । ବିଲକୁଲ ବିଚଳିତ ନୁହଁନ୍ତି । ସମସ୍ତେ ନିଜ ନିଜ ଗୋଟି ଚାଳନା କରୁଥିଲେ ବି ମୋଦିଙ୍କ “କୁଛ ଭି ହୋ ସକତା ହେ” ଅସମ୍ଭବ ନୁହେଁ । ମୋ-ଶା ଙ୍କୁ କେହି ବୁଝିବା ପୂର୍ବରୁ ଦୁହେଁ ଖେଳ କରିଦେବେ। ପାଗ ଭିଡୁ ଭିଡୁ … । ଆଗୁଆ ସୂଚନା ନ ମିଳିଲେ, ଏତେ ଦୃଢ଼ତା କେବେ ଦେଖିବାକୁ ମିଳେନାହିଁ । ଧର୍ମେନ୍ଦ୍ରଙ୍କ ଇସ୍ତଫା ଦାବି କରି ବୋଧହୁଏ ବିରୋଧୀ ମାନେ ମୋଦି ସରକାରକୁ ଚେକ ଦେବାକୁ ଯୋଜନା କରୁଥିବେ ।

ବିରୋଧୀ ଦଳ ଶକ୍ତ ହେବା ଗଣତନ୍ତ୍ରରେ ଶୁଭଙ୍କର । ବିରୋଧୀ ଦଳ ଶକ୍ତିଶାଳୀ ହେବାକୁ ଚେଷ୍ଟା କଲେ ସିନା ହେବ । ସିଷ୍ଟମ ସଂଶୋଧନ ସରକାର ଓ ବିରୋଧୀ ଦଳ ମିଶି କରନ୍ତୁ, ଭଲ ହେବ। ପ୍ରଶାସନ ଠାରୁ କାମ ଆଦାୟ କରନ୍ତୁ, ଭଲ ହେବ। ସେମିତି ହେଲେ, ଜନତା ଜାଣିବେ, ବିରୋଧୀ କିଛି କରୁଛନ୍ତି । କିନ୍ତୁ ଏମାନେ ଦିଲ୍ଲୀରେ ହିରୋ ଗ୍ରାଉଣ୍ଡରେ ଜିରୋ ହେଲେ କଣ ହେବ । କଥା ଏତିକି, ତଥାପି ଧର୍ମେନ୍ଦ୍ର ଇସ୍ତଫା ଦେବେ ….