PiN Barta
ପିନ୍ ବାର୍ତ୍ତା: ରାଜନୀତିରେ କ୍ଷମତା ପରିବର୍ତ୍ତନ ସହ ସମୀକରଣ ବଦଳିବା ଏକ ସ୍ୱାଭାବିକ ପ୍ରକ୍ରିୟା , କିନ୍ତୁ ଯେତେବେଳେ ଆଦର୍ଶ ପଛରେ ପଡ଼ିଯାଏ ଏବଂ ସୁବିଧାବାଦୀ ରାଜନୀତି ଆଗକୁ ଚାଲିଆସେ , ସେତେବେଳେ ମୂଳ ସଙ୍ଗଠନକାରୀଙ୍କ ମନରେ କୋହ ସୃଷ୍ଟି ହେବା ନିଶ୍ଚିତ । ଭାରତୀୟ ଜନତା ପାର୍ଟି (BJP) ଆଜି ଓଡ଼ିଶାରେ କ୍ଷମତା ଶୀର୍ଷରେ ପହଞ୍ଚିଛି , କିନ୍ତୁ ଏହି ସଫଳତା ପଛରେ ରହିଛି ସେହି ନିଷ୍ଠାପର “ଦେବଦୁର୍ଲ୍ଲଭ କାର୍ଯ୍ୟକର୍ତ୍ତା” ମାନଙ୍କ ବର୍ଷ ବର୍ଷର ରକ୍ତ ଓ ଝାଳ , ଯେଉଁମାନେ ଦଳର ଶୂନ୍ୟ ସ୍ଥିତି ସମୟରେ ମଧ୍ୟ ପଦ୍ମ ଚିହ୍ନକୁ ଧରି ଗାଁ ଗାଁ ବୁଲିଥିଲେ । ମାତ୍ର ସାମ୍ପ୍ରତିକ ସ୍ଥିତିରେ , ବିଶେଷ କରି ବିଜୁ ଜନତା ଦଳ (BJD) ରୁ ନେତାମାନେ ବହୁ ସଂଖ୍ୟାରେ ଆସି ବିଜେପିରେ ସାମିଲ ହେବା ଏବଂ ଦଳ ସେମାନଙ୍କୁ ପୁରସ୍କୃତ କରିବା ପରେ , ଦଳ ପାଇଁ ଜୀବନ ଦେଇଥିବା ପୁରୁଣା କାର୍ଯ୍ୟକର୍ତ୍ତାମାନେ ନିଜକୁ ସମ୍ପୂର୍ଣ୍ଣ ଅବହେଳିତ ମନେ କରୁଛନ୍ତି ।
ଗତ କିଛି ବର୍ଷ ମଧ୍ୟରେ ଓଡ଼ିଶା ବିଜେପିକୁ ଅନ୍ୟ ଦଳର ଅନେକ ହେଭିୱେଟ୍ ନେତା ଆସିଛନ୍ତି । ବିଶେଷ କରି ସୁଜିତ୍ କୁମାର , ମମତା ମହାନ୍ତ , ଦେବାଶିଷ ସାମନ୍ତରାୟ , ପ୍ରଦୀପ ପାଣିଗ୍ରାହୀ , ପ୍ରଶାନ୍ତ ଜଗଦେବ , ରବୀନ୍ଦ୍ର ଜେନା , ଅରବିନ୍ଦ ଢାଲି ଏବଂ ପ୍ରେମାନନ୍ଦ ନାୟକଙ୍କ ଭଳି ପ୍ରଭାବଶାଳୀ ବିଜେଡି ନେତାମାନେ ବିଜେପିରେ ସାମିଲ ହୋଇଛନ୍ତି । ନିର୍ବାଚନ ଜିତିବା ପାଇଁ ଏହା ଏକ ରଣନୀତି ହୋଇପାରେ , କିନ୍ତୁ ଏହାଦ୍ୱାରା ତୃଣମୂଳ ସ୍ତରର ମୂଳ ବିଜେପି କାର୍ଯ୍ୟକର୍ତ୍ତାମାନେ ମାନସିକ ସ୍ତରରେ ଆଘାତ ପାଇଛନ୍ତି । ଯେଉଁ ନେତାମାନଙ୍କ ଦୁର୍ନୀତି ଓ ଅତ୍ୟାଚାର ବିରୁଦ୍ଧରେ ସେମାନେ ବର୍ଷ ବର୍ଷ ଧରି ଆନ୍ଦୋଳନ କରି ଆସୁଥିଲେ , ସେମାନଙ୍କୁ ଆଜି ନିଜ ଦଳର ମୁଖ୍ୟ ଆସନରେ ଦେଖି ପୁରୁଣା କାର୍ଯ୍ୟକର୍ତ୍ତା ନିଜକୁ ହତାଶ ମନେ କରୁଛନ୍ତି । ଗୁରୁତ୍ୱପୂର୍ଣ୍ଣ ପଦପଦବୀ ଓ ଟିକେଟ୍ ବଣ୍ଟନ ସମୟରେ ମୂଳ କାର୍ଯ୍ୟକର୍ତ୍ତାଙ୍କ ଅପେକ୍ଷା ଏହି ନୂଆ ଆଗନ୍ତୁକ ନେତାଙ୍କୁ ଅଧିକ ପ୍ରାଧାନ୍ୟ ଦିଆଯାଉଥିବାରୁ ଅସନ୍ତୋଷ ତୀବ୍ର ହେବାରେ ଲାଗିଛି ।
ଏହି ସମସ୍ୟା କେବଳ ଓଡ଼ିଶାରେ ସୀମିତ ନାହିଁ , ବରଂ ସାରା ଭାରତରେ ବିଜେପିର ଏହି ବ୍ୟାପକ ମିଶ୍ରଣ ପର୍ବ ପୁରୁଣା କାର୍ଯ୍ୟକର୍ତ୍ତାଙ୍କ ଚିନ୍ତା ବଢ଼ାଇଛି । ଉଦାହରଣ ସ୍ୱରୂପ , ମହାରାଷ୍ଟ୍ରରେ କଂଗ୍ରେସର ବଡ଼ ନେତା ଅଶୋକ ଚୌହ୍ବାନ , ଏନସିପିର ଅଜିତ ପାୱାର ଗୋଷ୍ଠୀ ଏବଂ ଶିବସେନାର ଏକନାଥ ସିନ୍ଦେ ଗୋଷ୍ଠୀଙ୍କୁ ବିଜେପି ନିଜ ପରିସରକୁ ଆଣି କ୍ଷମତା ଭାଗ କରିଛି । ସେହିପରି ଜ୍ୟୋତିରାଦିତ୍ୟ ସିନ୍ଧିଆ କଂଗ୍ରେସ ଛାଡ଼ି ମଧ୍ୟପ୍ରଦେଶରେ ବିଜେପିକୁ ଆସି କେନ୍ଦ୍ର ମନ୍ତ୍ରୀ ହେଲେ । ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଧ୍ୟ କଂଗ୍ରେସରୁ ଆସି ଆଜି ବିଜେପିର ଶୀର୍ଷ ନେତା ସାଜିଛନ୍ତି । ପଞ୍ଜାବରେ ମଧ୍ୟ କ୍ୟାପଟେନ ଅମରିନ୍ଦର ସିଂ ଏବଂ ସୁନୀଲ ଜାଖଡ଼ ଭଳି ପୂର୍ବତନ କଂଗ୍ରେସ ନେତାମାନଙ୍କୁ ବିଜେପି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଛି ।
କ୍ଷମତା ରାଜନୀତିରେ ଦଳବଦଳ ଏକ ସ୍ୱାଭାବିକ ପ୍ରକ୍ରିୟା ହୋଇପାରେ , କିନ୍ତୁ ଯେଉଁମାନେ ବିନା କୌଣସି ସ୍ୱାର୍ଥରେ ଦଳକୁ ଶୂନ୍ୟରୁ ଶୀର୍ଷକୁ ନେଇଛନ୍ତି , ସେହି ସଙ୍ଗଠନକାରୀଙ୍କୁ ଅଣଦେଖା କରିବା ଆଗାମୀ ଦିନରେ ଦଳ ପାଇଁ ମହଙ୍ଗା ପଡ଼ିପାରେ । ଯଦି ଦେବଦୁର୍ଲ୍ଲଭ କାର୍ଯ୍ୟକର୍ତ୍ତାଙ୍କ ଏହି କୋହ ଓ ଅସନ୍ତୋଷକୁ ଠିକ୍ ସମୟରେ ପ୍ରଶମିତ କରାନଯାଏ , ତେବେ ତୃଣମୂଳ ସ୍ତରରେ ଦଳର ମୂଳଦୁଆ ଦୁର୍ବଳ ହେବାର ଆଶଙ୍କା ରହିଛି ।
Kirti Kiran Mahapatra
Editor
