Kirti Kiran Mahapatra
ପିନ୍ ବାର୍ତ୍ତା: ଭୁବନେଶ୍ୱରରେ ଆବାସିକ କିମ୍ବା ବାସଗୃହ ନିର୍ମାଣ କରି ସେଥିରେ ବ୍ୟବସାୟିକ ଦୋକାନ ବଜାର, ଅଫିସ୍ କିମ୍ବା ଅନ୍ୟାନ୍ୟ କମର୍ସିଆଲ୍ କାମଧନ୍ଦା ଚଳାଉଥିବା ସମ୍ପତ୍ତି ମାଲିକମାନଙ୍କ ପାଇଁ ଭୁବନେଶ୍ୱର ମହାନଗର ନିଗମ (BMC) ପକ୍ଷରୁ ଏକ ବଡ଼ ଆଶ୍ୱସ୍ତିକର ପଦକ୍ଷେପ ନିଆଯାଇଛି । ବିଏମସି ପକ୍ଷରୁ ସ୍ପଷ୍ଟ କରାଯାଇଛି ଯେ ନିଜର ଆବଶ୍ୟକୀୟ କାଗଜପତ୍ର, ପ୍ଲାନ ଅନୁମୋଦନ ଏବଂ ଅନ୍ୟାନ୍ୟ ଆଇନଗତ ଦସ୍ତାବିଜ ଜମା କରିବା ପାଇଁ ପୂର୍ବରୁ ଯେଉଁ ମାତ୍ର ଦୁଇ ସପ୍ତାହର ସମୟସୀମା ଦିଆଯାଇଥିଲା, ତାକୁ ବଢ଼ାଇ ବର୍ତ୍ତମାନ ଚାରି ସପ୍ତାହ କରାଯାଇଛି ।
ଖବର ଅନୁସାରେ ମାନ୍ୟବର ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ କ୍ରମେ ସହରରେ ଚାଲିଥିବା ବେଆଇନ ନିର୍ମାଣ ଏବଂ ଘରଗୁଡ଼ିକୁ ବେଆଇନ ଭାବରେ ବ୍ୟବସାୟିକ କାମରେ ଲଗାଇଥିବା ଘଟଣା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଏହି ପଦକ୍ଷେପ ନିଆଯାଇଛି । ଏହି କ୍ରମରେ ପ୍ରମୁଖ ସରକାରୀ ଓ ବେସରକାରୀ ଅନୁଷ୍ଠାନ, ଶିକ୍ଷାନୁଷ୍ଠାନ, ହସ୍ପିଟାଲ, ହୋଟେଲ ଏବଂ ବିଭିନ୍ନ କମ୍ପାନୀଗୁଡ଼ିକୁ ନୋଟିସ୍ ଜାରି କରାଯାଇଥିଲା ।
ନୋଟିସ ପାଇଥିବା ବ୍ୟକ୍ତିମାନେ ସେମାନଙ୍କର ଘର ନକ୍ସା, ଯୋଜନାଗତ ଅନୁମତି, ଅକ୍ୟୁପାନ୍ସି କିମ୍ବା କମ୍ପ୍ଲିସନ୍ ସାର୍ଟିଫିକେଟ୍ ଏବଂ ଅନ୍ୟାନ୍ୟ ଜରୁରୀ କାଗଜପତ୍ରଗୁଡ଼ିକୁ ସମ୍ପୂର୍ଣ୍ଣ ଅନଲାଇନରେ ଦାଖଲ କରିବାର ସୁବିଧା ପାଇପାରିବେ । ଏଥିପାଇଁ ଲୋକଙ୍କୁ କୌଣସି ସରକାରୀ ଅଫିସକୁ ଦୌଡ଼ିବାକୁ ପଡ଼ିବ ନାହିଁ, ବରଂ ସେମାନେ BMC ପୋର୍ଟାଲ୍ କିମ୍ବା ଭୁବନେଶ୍ୱର ୱାନ୍ (Bhubaneswar One) ପୋର୍ଟାଲ୍ ଜରିଆରେ ଘରେ ବସି ନିଜର ସମସ୍ତ ଡକ୍ୟୁମେଣ୍ଟ ସୁବିଧାରେ ଅପଲୋଡ୍ କରିପାରିବେ ।
ବିଏମସି ପକ୍ଷରୁ ସମସ୍ତ ପ୍ରଭାବିତ ସମ୍ପତ୍ତି ମାଲିକ ଓ ସଂସ୍ଥାଗୁଡ଼ିକୁ ଅନୁରୋଧ କରାଯାଇଛି ଯେ, ସେମାନେ ଏହି ବର୍ଦ୍ଧିତ ସମୟର ସୁଯୋଗ ନେଇ ନିର୍ଦ୍ଧାରିତ ଚାରି ସପ୍ତାହ ଭିତରେ ନିଜର ସମସ୍ତ କାଗଜପତ୍ର ଅନଲାଇନରେ ଜମା କରିଦିଅନ୍ତୁ । ଏହି ଦସ୍ତାବିଜଗୁଡ଼ିକ କେବଳ ବର୍ତ୍ତମାନର ଯାଞ୍ଚ ପ୍ରକ୍ରିୟା ପାଇଁ ସହାୟକ ହେବ ନାହିଁ, ବରଂ ଭବିଷ୍ୟତର ଯେକୌଣସି ଯାଞ୍ଚ କିମ୍ବା ଆବଶ୍ୟକତା ସମୟରେ ମଧ୍ୟ ସେମାନଙ୍କ ପାଇଁ ବଡ଼ ସୁରକ୍ଷା ଓ ପ୍ରମୁଖ ସାଧନ ହୋଇ ରହିବ ।
