PiN Barta
ଭାରତର ପ୍ରାଚୀନ ଆଧ୍ୟାତ୍ମିକ ପରମ୍ପରା ‘ଯୋଗ’ ଏବେ ବିଶ୍ୱ କ୍ରୀଡା ମଞ୍ଚରେ ନୂଆ ପରିଚୟ ସୃଷ୍ଟି କରୁଛି । ‘ଯୋଗାସନ’କୁ ୨୦୩୬ ଅଲିମ୍ପିକ୍ସରେ ପଦକ କ୍ରୀଡା ଭାବେ ସାମିଲ କରିବାକୁ ଭାରତ ପକ୍ଷରୁ ଜୋରଦାର ପ୍ରୟାସ ଆରମ୍ଭ ହୋଇଛି । ଚଳିତ ବର୍ଷ ଏସିଆନ୍ ଗେମ୍ସରେ ଯୋଗାସନ ପ୍ରଦର୍ଶନୀ କ୍ରୀଡା ଭାବେ ସ୍ଥାନ ପାଇଥିବା ବେଳେ, ଆସନ୍ତା ଜୁନ ୪ରୁ ୮ ତାରିଖ ପର୍ଯ୍ୟନ୍ତ ଆହମଦାବାଦରେ ପ୍ରଥମ ବିଶ୍ୱ ଯୋଗାସନ ଚ୍ୟାମ୍ପିଅନ୍ସିପ୍ ଆୟୋଜିତ ହେବ । ଏଥିରେ ୭୫ଟି ଦେଶ ଅଂଶଗ୍ରହଣ କରିବେ ।
ୱର୍ଲ୍ଡ ଯୋଗାସନର ଉପାଧ୍ୟକ୍ଷ ଉଦିତ ଶେଠ କହିଛନ୍ତି, ୨୦୩୦ କମନୱେଲ୍ଥ ଗେମ୍ସରେ ଯୋଗାସନକୁ ଭାରତୀୟ ମୂଳ କ୍ରୀଡା ଭାବେ ସାମିଲ କରାଯାଇଛି । ବର୍ତ୍ତମାନ ୨୦୩୨ ଅଲିମ୍ପିକ୍ସରେ ପ୍ରଦର୍ଶନୀ କ୍ରୀଡା ଭାବେ ସ୍ଥାନ ପାଇବା ଲକ୍ଷ୍ୟ ରହିଛି । ଅଲିମ୍ପିକ୍ ସ୍ୱୀକୃତି ପାଇଁ ବିଶ୍ୱର ତିନୋଟି ମହାଦେଶରେ କମ୍ ସେ କମ୍ ୫୦ଟି ସଂଘ ଆବଶ୍ୟକ ଥିବା ବେଳେ, ବର୍ତ୍ତମାନ ୪୦ଟି ଦେଶ ଯୋଗାସନ ସହ ଯୋଡି ହୋଇଛନ୍ତି ।
୨୦୧୯ରେ ଆୟୁଷ ମନ୍ତ୍ରାଳୟର ପ୍ରୟାସରେ ଯୋଗକୁ ପ୍ରତିଯୋଗିତାମୂଳକ କ୍ରୀଡାର ରୂପ ଦିଆଯାଇଥିଲା । ଜିମ୍ନାଷ୍ଟିକ୍ସ ଭଳି ଏଠାରେ ମଧ୍ୟ ବିଚାରପତି ମାର୍କିଂ କରିବେ । ଖେଳାଳିଙ୍କ ସ୍ଥିରତା, ସମତୁଳନ ଓ କଠିନ ଆସନ ଧରି ରଖିବା କ୍ଷମତାକୁ ମୂଲ୍ୟାୟନ କରିବେ । ଭାରତର ୭୦୦ରୁ ଅଧିକ ଜିଲ୍ଲାରେ ଯୋଗାସନ ପହଞ୍ଚିଥିବା ବେଳେ, ୩ ଲକ୍ଷରୁ ଅଧିକ ଖେଳାଳି ନିବନ୍ଧିତ ହୋଇଛନ୍ତି ।
କେବଳ ସେତିକି ନୁହେଁ, ଏହି ଖେଳରେ ‘ନାଡା’ (NADA) ଏବଂ ‘ୱାଡା’ (WADA) ର ଆଣ୍ଟି-ଡୋପିଙ୍ଗ ନିୟମକୁ ମଧ୍ୟ କଡ଼ାକଡ଼ି ଭାବେ ପାଳନ କରାଯାଉଛି ।
Kirti Kiran Mahapatra
